Rossiya benzin eksportini qisqartirmoqchi

Rossiya hukumati birja savdolarida narxlar oshishi sababli benzin eksportini qisqartirishni ko‘rib chiqmoqda. Ta‘minotning cheklanishi Rossiyadan to‘rt oy ichida 327,8 million litr benzinni har litri uchun 4579 so‘mdan import qilgan O‘zbekistonga taʼsir qilishi mumkin. Bu haqda Rossiya energetika vaziri Nikolay Shulginov maʼlum qildi.

 

Reuters agentligi yaqinda tanqislikning oldini olish uchun Rossiya hukumati eksportga taqiq qo‘yish va tovar birjasida benzinni majburiy sotish hajmini oshirish imkoniyatini ko‘rib chiqayotgani haqida yozgan. Biroq vazirning aytishicha, faqat eksportni qisqartirish masalasi muhokama qilinmoqda. Uning qo‘shimcha qilishicha, Energetika vazirligi tez orada yoqilg‘i bozoridagi vaziyatni baholaydi va benzin va dizel yonilg‘isi eksportini cheklash bo‘yicha takliflar kiritadi.

 

“Biz ‘taqiq‘ so‘zini ishlatmayapmiz, balki cheklovlar haqida gapiryapmiz. Energetika vazirligi kompaniyalarimizga yetkazib berishni ko‘paytirish va eksportni kamaytirish bo‘yicha tavsiyalar beradi, lekin taqiq emas. Chakana narxlar hozirda barqaror va biz yonilg‘i quyish shoxobchalarining yalpi marjasi yuqori darajada qolayotganini ko‘rib turibmiz, shuning uchun chakana savdoda bunday o‘zgarish bo‘lishi kutilmayapti”, — dedi Shulginov. 

 

Bundan tashqari,“RBK” xabariga ko‘ra, Rossiyada birja savdolarida benzin narxi bir necha oydan beri oshib bormoqda. May oyida Rossiyaning Yevropa qismida Ai-95 benzinining birja narxi bir necha marta rekordlarni yangiladi. Oxirgi tarixiy rekord 17 may kuni bir tonna uchun 61 409 rubl (768 dollar) o‘rnatildi. Energetika vazirligi matbuot xizmatining nashrga maʼlum qilishicha, Ai-95 birja narxlarining oshishi chakana savdoda benzin narxiga jiddiy taʼsir ko‘rsatmaydi: neftni qayta ishlash zavodidagi taʼmirlash mavsumi oldidan yonilg‘i zaxiralari yaratilgan.