Shavkat Mirziyoyev o‘z saylovoldi dasturini taqdim etdi
Boshlang‘ich sinf o‘quvchilari taʼlim planshetlari bilan to‘liq taʼminlanadi hamda chekka hududlarda maktab avtobuslari bepul yo‘lga qo‘yiladi.
Toshkent shahridagi Congress-hall majmuasida Tadbirkorlar va ishbilarmonlar harakati – O‘zbekiston Liberal-demokratik partiyasining navbatdan tashqari syezdida 9 iyul kuni bo‘lib o‘tadigan muddatidan ilgari O‘zbekiston Respublikasi prezidenti saylovida O‘zLiDePning ishtiroki va saylovda partiyadan ko‘rsatiladigan nomzod masalasi muhokama qilinmoqda. Bu haqda partiya matbuot xizmati xabar berdi.
Qurultoyda O‘zbekiston prezidentligiga «O‘zbekiston Liberal-demokratik partiyasining nomzodi Shavkat Mirziyoyev o‘z saylovoldi dasturining maqsad va vazifalarini qurultoy qatnashchilari eʼtiboriga havola etdi.
Jumladan, bio-texnologiya, sunʼiy intellekt va boshqa yuqori texnologik yo‘nalishlarda yiliga 500 nafar isteʼdodli yoshlar eng nufuzli xorijiy oliygohlarga davlat hisobidan o‘qishga yuboriladi. Shavkat Mirziyoyevning maʼlum qilishicha, buning uchun 200 million dollar yo‘naltiriladi. Shuningdek, 2030 yilga qadar maktabgacha taʼlimga bo‘lgan ehtiyoj to‘liq qoplanadi va qamrov 100 foizga yetkaziladi. Bog‘cha va maktablar filtrlangan ichimlik suvi bilan to‘liq taʼminlanadi.
Xususiy taʼlimga qo‘shimcha yengilliklar beriladi. Davlat-xususiy sheriklik asosida maktablar qurish keng joriy etiladi. Boshlang‘ich sinf o‘quvchilari taʼlim planshetlari bilan to‘liq taʼminlanadi. Chekka hududlarda maktab avtobuslari bepul yo‘lga qo‘yiladi. Kelgusi yetti yilda barcha maktablarga chet ellardan «til egalari» bo‘lgan o‘qituvchilar olib kelinadi.
«‘Gepatit S‘ kasalligini 100 foiz davlat hisobidan davolashni yo‘lga qo‘yamiz. ‘Tuberkulyoz‘ bilan kasallanish darajasini yuz ming aholiga nisbatan hozirgi 34 nafardan keskin kamaytirishga erishamiz. Shuningdek, onkologik bemorlar hayotini saqlab qolish maqsadida, mamlakatimizda ilk bor o‘zak hujayralarini transplantatsiya qilish yo‘lga qo‘yiladi», — dedi Shavkat Mirziyoyev.
Taʼkidlanishicha, bu boradagi xarajatlar ehtiyojmand oilalar farzandlari uchun to‘liq davlat hisobidan qoplanadi. Bundan tashqari, 2030-yilga qadar tibbiyotga byudjetdan ajratiladigan yillik mablag‘ hajmini 2 karra oshirib, 6 milliard dollarga yetkazish hamda O‘zbekistonda o‘rtacha umr davomiyligini hozirgi 73 yoshdan kelgusida 78 yoshga yetkazish rejalashtirilmoqda.
