Tabiat resurslari vazirligi nomi o‘zgardi
Bu haqda Prezidentning tegishli farmoni imzolandi.
Tabiat resurslari vazirligi «Ekologiya, atrof-muhitni muhofaza qilish va iqlim o‘zgarishi vazirligi» deya qayta nomlandi. Bu haqda vazirlik matbuot kotibi xabar berdi.
Prezidentning «Ekologiya va atrof-muhitni muhofaza qilish sohasini transformatsiya qilish va vakolatli davlat organi faoliyatini tashkil etish chora-tadbirlari to‘g‘risida»gi farmoniga ko‘ra, Tabiat resurslari vazirligi «Ekologiya, atrof-muhitni muhofaza qilish va iqlim o‘zgarishi vazirligi» deya qayta nomlandi.
Qayd etilishicha, bundan maqsad Prezidentning «Respublika ijro etuvchi hokimiyat organlari faoliyatini samarali yo‘lga qo‘yishga doir birinchi navbatdagi tashkiliy chora-tadbirlar to‘g‘risida»gi farmoni ijrosini taʼminlash, raqamli texnologiyalar asosida zamonaviy ekologik monitoring mexanizmini yaratish, ekologik madaniyatni yana-da oshirish, bioxilmaxillikni asrash va chiqindilar bilan bog‘liq ishlarni tartibga solish, shuningdek, daraxt, butalarni ekish va yashil hududlarni tashkil qilish hamda ularni muhofaza qilishning yangi tartiblarini joriy qilish orqali ekologik vaziyatni tubdan yaxshilashdir.
