IIB formasida sigaret chekib, behayo so‘zlar ishlatgan qizning shaxsi aniqlandi
Holat bo‘yicha shahar IIBB maʼlumot berdi
Ijtimoiy tarmoqlarda bir qiz avtomobilda ichki ishlar xodimi kiyimida sigaret chekayotgani va behayo so‘zlarni ishlatayotgani tasvirlangan video tarqaldi. Toshkent shahar IIBB holat bo‘yicha munosabat bildirdi.
Aniqlanishicha, mazkur videodagi qiz maktab o‘quvchisi – voyaga yetmagan 2006 yilda tug‘ilgan S.A. bo‘lib, uning ota-onasi bilan birga profilaktik suhbat o‘tkazilgan. Ularga qiz ichki ishlar organlari formasini ruxsatsiz kiyish bilan Maʼmuriy javobgarlik to‘g‘risidagi kodeksining tegishli moddasiga ko‘ra, yaʼni formali kiyim-bosh kiyib yurishi nazarda tutilgan vazirliklar, idoralar va tashkilotlar harbiy xizmatchilari hamda xodimlarining tasdiqlangan namunadagi harbiy, idoraviy va maxsus formali kiyim-boshini bunday huquqqa ega bo‘lmagan shaxslar tomonidan kiyib yurish taqiqlangani va bu xatti-harakati bilan u qonunni buzgani tushuntirilgan.
Suhbat davomida qiz ushbu formani tanishi 20 yoshli Sh.M.dan olgani va ushbu video unga tegishli bo‘lgan Cobalt rusumli avtomobilda suratga olinganligini bildirgan. Tekshiruv jarayonida Sh.M. ushbu formani qonunga xilof ravishda saqlaganligi aniqlangan.
Mazkur holat bo‘yicha qizning onasi V.A.ga nisbatan Maʼmuriy javobgarlik to‘g‘risidagi kodeksining 47-moddasi (“Farzandlarni tarbiyalash va o‘qitish bo‘yicha majburiyatlarni bajarmaslik”) bilan maʼmuriy bayonnoma rasmiylashtirilgan. Shuningdek, Sh.M.dan forma o‘rnatilgan tartibda olib qo‘yilgan. Sh.M. Maʼmuriy javobgarlik to‘g‘risidagi kodeksining tegishli moddasi bilan javobgarlikka tortilgan, sud tomonidan unga nisbatan bazaviy hisoblash miqdorining ikki barobari miqdorida jarima jazosi tayinlangan.
