Xorazmdagi barcha maktab va bog`chalar to‘liq filtrlangan ichimlik suvi bilan ta’minlanadi
Shavkat Mirziyoyevning xorazmlik saylovchilar bilan uchrashuvi boshlandi.
Tadbirkorlar va ishbilarmonlar harakati – O‘zbekiston Liberal-demokratik partiyasidan O‘zbekiston prezidentligiga nomzod Shavkat Mirziyoyevning xorazmlik saylovchilar bilan uchrashuvi boshlandi. Uchrashuvda nomzod saylovchilarni o‘zining saylovoldi dasturi bilan tanishtirmoqda.
Jumladan, Shavkat Mirziyoyevning taʼkidlashicha, Xorazmdagi barcha bog‘cha va maktablar filtrlangan ichimlik suvi bilan to‘liq taʼminlanadi. Shuningdek, 2030-yilga qadar maktabgacha taʼlimga bo‘lgan ehtiyoj to‘liq qoplanadi va qamrov hozirgi 79 foizdan 100 foizga yetkazilishi rejalashtirilgan.
Shu maqsadda, qariyb 2 trillion so‘m mablag‘ hisobiga 500 ga yaqin yangi bog‘chalar tashkil etiladi. Shu bilan birga, kelgusi yetti yilda viloyatda zamonaviy maktablar barpo etish, mavjudlarining quvvatini oshirish hisobiga qo‘shimcha 90 ming o‘quvchi o‘rni yaratiladi.
«Aholining zamonaviy uy-joyga o‘sib borayotgan talabini qondirish maqsadida, 50 ming xonadonga ega 2 mingta ko‘p qavatli uylar barpo etiladi», — deydi prezidentlikka nomzod.
Bundan tashqari, 2030-yilga qadar viloyatning Urganch, Xiva, Pitnak shaharlari, Gurlan, Tuproqqalʼa, Hazorasp, Bog‘ot, Xonqa va Yangiariq tumanlaridagi 1 million aholi suv taʼminoti yaxshilanadi. Buning uchun 100 million dollar yo‘naltiriladi.
