Qoraqalpog‘istondagi YTH oqibatida ikki kishi halok bo‘ldi
Qoraqalpog‘iston Respublikasi IIV holat bo‘yicha rasmiy munosabat bildirdi.
Qoraqalpog‘iston Respublikasi IIV xabariga ko‘ra, kecha 12 iyun kuni soat 14:30 atrofida «Nukus – Chimboy – Taxtako‘pir» 4R-176 avtomobil yo‘lining 43 va 44-kilometrlari oralig‘ida o‘lim bilan bog‘liq YTH sodir bo‘ldi.
Fuqaro R.T. boshqaruvidagi Labo avtomashinasi hamda qarama-qarshi yo‘lakda harakatlanib kelayotgan fuqaro B.M. boshqaruvidagi Lacetti avtomashinasi to‘qnashib ketgan.
To‘qnashuv natijasida Labo haydovchisi va Lacetti yo‘lovchisi olgan tan jarohatlari natijasida voqea joyida vafot etgan. Lacetti haydovchisi va voyaga yetmagan yo‘lovchisi Kegeyli tumani tibbiyot birlashmasi shifoxonasiga yotqizilgan.
Mazkur holat yuzasidan Qoraqalpog‘iston Respublikasi IIV huzuridagi Tergov boshqarmasi tomonidan JKning 266-moddasi 3-qismi “a” bandi (transport vositalari harakati yoki ulardan foydalanish xavfsizligi qoidalarini buzish, odamlar o‘limiga sabab bo‘lsa) bilan jinoyat ishi qo‘zg‘atilib, dastlabki tergov harakatlari olib borilmoqda.
