Dehli xalqaro aeroportida ikki o‘zbekistonlik qo‘lga olindi
Ular katta miqdorda tilla buyumlarni Hindiston hududiga noqonuniy olib kirmoqchi bo‘lgan.
Toshkent-Dehli samolyotida uchib kelgan ikki nafar o‘zbekistonlik fuqaro katta miqdorda tilla buyumlarini Hindiston hududiga noqonuniy yo‘l bilan olib kirishga urinayotganda qo‘lga olingan, deb xabar bermoqda “Dunyo”.
Hozir ularga nisbatan surishtiruv ishlari o‘tkazilmoqda. Mavjud maʼlumotlarga ko‘ra, ushbu O‘zbekiston fuqarolari Dehliga tijorat maqsadlarida muntazam tarzda kelib turgan.
Mamlakatning Dehlidagi elchixonasi tomonidan fuqarolar bilan bog‘liq surishtiruv jarayoni nazoratga olingan va Hindistonning masʼul huquq-tartibot idoralari bilan ishchi aloqalar o‘rnatilgan. Shuningdek, vaqtincha hibsga olingan vatandoshlar bilan uchrashuv o‘tkazish choralari ko‘rilmoqda.
Diplomatik missiya vatandoshlarni xorijga, jumladan, Hindistonga safar qilish chog‘ida chet davlatlar qonunchiligi talablariga qatʼiy rioya qilishga, turli shubhali guruhlar yoki shaxslarning yolg‘on vaʼdalariga aldanib qolmaslikka chaqirgan.
