Fox News telekanalining sobiq boshlovchisi Baydenning o‘g‘lini chet el agenti deb atadi
Karlson prezidentning o‘g‘li o‘z xizmatlarini Xitoy, Ukraina va boshqa mamlakatlarga taklif qilganini taʼkidladi.
Fox News telekanalining sobiq boshlovchisi Taker Karlson Twitterda AQSH prezidenti Jo Baydenning o‘g‘li Xanter chet el agenti maqomiga loyiq ekanini aytdi, chunki u FQB maʼlumoti bilan «otasi va boshqa qonunchilarga yillar davomida kirish huquqini sotgan».
Jurnalistning so‘zlariga ko‘ra, Xanter Bayden AQSHning xorijiy agentlarni ro‘yxatga olish to‘g‘risidagi qonunini (FARA) bir necha bor buzgan. Karlson prezidentning o‘g‘li o‘z xizmatlarini Xitoy, Ukraina va boshqa mamlakatlarga taklif qilganini taʼkidladi.
«Agar tizim adolatli bo‘lsa, Xanter Bayden FARAni buzganlikda ayblanayotganlar ro‘yxatida birinchi bo‘lardi. Xanter Bayden chet el agenti edi, u hech qachon ro‘yxatdan o‘tmagan», — dedi Karlson.
Uning qo‘shimcha qilishicha, Vashington uchun «amerikalik saylovchilar ehtiyojlaridan» ko‘ra Ukraina hukumatining talablari muhimroq. Jurnalist FQB hech qachon Xanter Bayden faoliyatini tekshirmasligiga ishonch bildirdi.
Avvalroq, Vakillar palatasida ko‘pchilik ovozni qo‘lga kiritgan respublikachilar AQSHning amaldagi prezidenti Jo Bayden o‘g‘li Xanter bilan birga faol ishtirok etgan xorijiy biznes operatsiyalarini tekshirish niyatida ekanliklarini maʼlum qilgan edi. Oq uy bunga javoban Respublikachilar partiyasini «uzoqdan beri inkor etib kelinayotgan fitna nazariyalarini» ishlab chiqishda aybladi.
