“Kompromat ishi” sudga oshirildi

 

Avvalroq DXX Human.uz sayti direktori Xurshid Daliyev va "davlat tashkilotlarida ishlovchi boshqa shaxslar" Telegramdagi “Kompromatuzb” va boshqa kanallar orqali sodir etilgan jinoyatlarga aloqadorlikda gumonlanayotganib, qo‘lga olingandi. Mazkur holat bilan bog‘liq jinoyat ishi yuzasidan Oliy sud matbuot xizmati maʼlumot berdi.

 

Maʼlum qilinshicha, Jinoyat kodeksining 139-moddasi 2-qismi, 165-moddasi 3-qismi “a” bandi, 25,165-moddasi 3-qismi “a” bandi, 184-moddasi 3-qismi va 243-moddasi bilan ayblangan X. D. (1984-yilda Andijon viloyatida tug‘ilgan), Jinoyat kodeksining 139-moddasi 2-qismi, 165-moddasi 3-qismi “a” bandi, 25,165-moddasi 3-qismi “a” bandi va 243-moddasi bilan ayblangan S. X. (1983-yilda Qashqadaryo viloyatida tug‘ilgan), Jinoyat kodeksining 139-moddasi 2-qismi, 165-moddasi 3-qismi “a” bandi va 25,165-moddasi 3-qismi “a” bandi bilan ayblangan A. A. (2004-yilda Andijon viloyatida tug‘ilgan) hamda Jinoyat kodeksining 165-moddasi 2-qismi “a”, “b”, “v” bandlari bilan ayblangan M. M. (ayol, 1973-yilda Andijon viloyatida tug‘ilgan) ga oid jinoyat ishi jinoyat ishlari bo‘yicha Shayxontohur tuman sudining ish yurituviga kelib tushgan bo‘lib, ayni paytda ushbu jinoyat ishi “E-XSUD” elektron axborot tizimi orqali sudyalar o‘rtasida taqsimlanish jarayonidadir.

 

Tasdiqlangan ayblov xulosasiga ko‘ra mazkur jinoyat ishi bo‘yicha 19 nafar jabrlanuvchi va 10 nafar fuqaroviy daʼvogar mavjud bo‘lib, jinoyat oqibatida ularga jami 5 138 000 000 so‘m miqdorida moddiy zarar yetkazilganligi aniqlangan.

 

Jinoyat ishini ko‘rib chiqish bo‘yicha sud jarayoni boshlanishi haqida qo‘shimcha maʼlumot beriladi, deyiladi rasmiy xabarda.