Qarzni o‘z vaqtida to‘lamaganlik uchun jarima belgilangan summadan oshirilmaydigan bo‘ldi

 

Prezident tomonidan imzolangan qonun bilan ayrim qonun hujjatlariga ijro hujjatlarini ijro etmaganlik uchun solinadigan maʼmuriy jarima miqdorini belgilashga qaratilgan o‘zgartirishlar va qo‘shimcha kiritildi.

 

Jumladan, maʼmuriy javobgarlik to‘g‘risidagi kodeksga kiritilgan o‘zgartirish va qo‘shimchalarga ko‘ra, BHMning 10 baravariga teng yoki undan oshmaydigan miqdordagi summani undirish to‘g‘risidagi ijro hujjatini ixtiyoriy ravishda ijro etish uchun belgilangan muddatda qarzdor tomonidan ijro etmaslik:

 

• fuqarolarga BHMning 5 baravarigacha (1 mln 650 ming so‘mgacha);

• mansabdor shaxslarga esa 10 baravarigacha (3 mln 300 ming so‘mgacha) miqdorda jarima solishga sabab bo‘ladi.

 

Ilgari jarimaning eng kam miqdori qatʼiy belgilangan bo‘lib, fuqarolarga BHMning 1 baravaridan, mansabdor shaxslarga esa 5 baravaridan boshlab jarima qo‘llanilgan. 

 

Shuningdek, maʼmuriy jarima summasi ijro hujjatida undirilishi belgilangan summadan oshishi mumkin emasligi belgilandi. Ilgari bunday norma mavjud emas edi.

 

Qonunga ko‘ra, Majburiy ijro byurosi nomidan maʼmuriy huquqbuzarliklar to‘g‘risidagi ishlarni ko‘rib chiqishga hamda maʼmuriy jazo choralarini qo‘llashga endilikda quyidagilar haqli:

 

• O‘zbekiston Respublikasining Bosh davlat ijrochisi;

• Qoraqalpog‘iston Respublikasi, viloyatlar va Toshkent shahrining bosh davlat ijrochilari, ularning o‘rinbosarlari;

• Majburiy ijro byurosining tuman (shahar) bo‘limlari boshliqlari.

 

Ilgari maʼmuriy jazo choralarini qo‘llash davlat ijrochilariga tegishli bo‘lgan.