O`zbekistonda harorat 45 darajagacha isiydi
Hafta davomida issiq harorat yana-da kuchayishi kutilmoqda
“O‘zgidromet” maʼlumotlariga ko‘ra, ushbu haftaning katta qismida O‘zbekiston hududi bo‘yicha ob-havo Eron hududlaridan issiq havo kirib kelishi bilan belgilanadi.
Qayd etilishicha, havo harorati kundan-kunga ko‘tariladi. Respublika hududlarining katta qismida issiq ob-havoning cho‘qqisi haftaning o‘rtalariga to‘g‘ri keladi. Xususan, 12-13 iyul kunlari kunduzgi havo harorati 40-42 darajagacha, janubda va cho‘l hududlarda 43-45 darajagacha ko‘tariladi.
Shuningdek, Qoraqalpog‘iston va Xorazm viloyatining shimolida 11-12 iyul kunlari eng yuqori harorat 43-45 daraja bo‘lishi kutilmoqda.
"Kuchli issiq qisqa muddat kuzatiladi. 13 iyulda O‘zbekistonning shimoli-g‘arbiy hududlarida, 14 iyulda respublikaning barcha hududlarida atmosferadagi janubiy oqimlar g‘arbiy oqimlarga o‘zgaradi va havo harorati 33-38 darajagacha, janubda 40 darajagacha pasayadi. Bunday harorat foni dam olish kunlarida ham saqlanib turadi", — deyiladi xabarda.
Ushbu hafta davomida respublikaning barcha hududlari bo‘yicha havo kam bulutli va asosan quruq bo‘lishi kutilmoqda.
