Shavkat Mirziyoyev MDH bosh kotibi bilan uchrashdi
Uchrashuvda ko‘p tomonlama sheriklikni kengaytirishga qaratilgan dastur va loyihalarni amalga oshirishga alohida eʼtibor qaratildi.
Shavkat Mirziyoyev 10-iyul kuni Mustaqil Davlatlar Hamdo‘stligining kuzatuvchilar missiyasi boshchiligida O‘zbekistonda bo‘lib turgan ushbu tashkilot bosh kotibi Sergey Lebedevni qabul qildi. Uchrashuv avvalida MDH bosh kotibi davlat rahbarini prezidenti saylovida qozongan ishonchli g‘alabasi bilan samimiy tabriklab, unga baxt-saodat, mamlakat barqaror taraqqiyoti va ravnaqini taʼminlash yo‘lida muvaffaqiyatlar tiladi.
"Saylov xalqaro standartlarga to‘liq mos holda o‘tgani qayd etildi. Saylovchilar ishtirokining yuqori darajasi hamda ovoz berish natijalari aholi amalga oshirilayotgan islohotlar dasturini keng qo‘llab-quvvatlayotgani va unga ishonishidan dalolat ekani alohida taʼkidlandi", — deyiladi xabarda.
Shuningdek, uchrashuvda MDH doirasidagi o‘zaro manfaatli hamkorlikni kengaytirish masalalari ham muhokama qilindi.
Xususan, keyingi yillarda O‘zbekiston Hamdo‘stlikning 40 dan ziyod bitimlarini imzoladi, 24 ta sohaviy organlariga qo‘shildi. Kuni kecha Toshkentda MDHga aʼzo davlatlar saylov komissiyalari rahbarlari maslahat kengashining birinchi yig‘ilishi o‘tkazildi.
Bundan tashqari, uchrashuvda ko‘p tomonlama sheriklikni kengaytirishga qaratilgan dastur va loyihalarni amalga oshirishga alohida eʼtibor qaratildi.
