O‘zbekiston avtomobil bozorida iyun oyida pasayish kuzatildi
Ushbu oyda yangi mahalliy yengil avtomobillar savdosi 20 foizga kamaygan bo‘lsa, xorijda ishlab chiqarilgan yangi yengil avtomobillar savdosi 14 foizga o‘sdi.
Iqtisodiy tadqiqotlar va islohotlar markazi maʼlumotlariga ko‘ra, 2023-yil boshidan beri may oyi O‘zbekiston avtomobil bozoridagi eng muvaffaqiyatli oy bo‘ldi, biroq iyun oyida pasayish kuzatildi.
Qayd etilishicha, iyun oyida sotilgan avtomobillar soni 123 mingtani tashkil etdi. Ushbu ko‘rsatkich may oyi bilan solishtirilganda 21 foizga pasayganini, 2022-yilning iyun oyiga nisbatan 2,6 foizga o‘sganini ko‘rish mumkin.
Yozning birinchi oyida O‘zbekistonda 110,5 ming dona yengil avtomobil sotilgan bo‘lib, ko‘rsatkich bir oy davomida 21,6 foizga kamaygan.
Shuningdek, iyun oyi davomida birlamchi bozorda yengil avtomobillar savdosi 17,5 foizga kamaydi. Ushbu oyda yangi mahalliy yengil avtomobillar savdosi deyarli 24 mingni tashkil etdi va may oyiga nisbatan 20 foizga kamaydi.
Xorijda ishlab chiqarilgan yangi yengil avtomobillar savdosi esa iyun oyida 3,7 mingtani tashkil etib, 14 foizga o‘sdi.
Bundan tashqari, 2023-yilning birinchi yarmida elektromobillar savdosi 7,6 mingtani tashkil etib, yillik o‘sishi 1,7 baravar ko‘paygani ko‘rish mumkin.
