Shavkat Mirziyoyev Saudiya Arabistoniga boradi
O'zbekiston Prezidenti Saudiya Podshohining taklifiga binoan 2 kun ushbu mamlakatda bo'ladi
Saudiya Arabistoni Podshohi Salmon bin Abdulaziz Ol Saudning taklifiga binoan Shavkat Mirziyoyev “Markaziy Osiyo — Ko‘rfaz arab mamlakatlari hamkorlik kengashi” formatidagi birinchi sammitda ishtirok etish uchun joriy yil 18-19 iyul kunlari Jidda shahrida bo‘ladi.
Prezident matbuot xizmatining xabar berishicha, bo‘lajak oliy darajadagi uchrashuvda Saudiya Arabistoni, Bahrayn, Qatar Davlati, Kuvayt, Birlashgan Arab Amirliklari, Ummon, Qozog‘iston, Qirg‘iziston, Tojikiston va Turkmaniston rahbarlari hamda kengashning bosh kotibi ishtirok etishi ko‘zda tutilgan.
Kun tartibiga muvofiq, siyosiy, savdo-iqtisodiy, investitsiyaviy va madaniy-gumanitar sohalarda mintaqalararo hamkorlikni rivojlantirish masalalari ko‘rib chiqiladi. Xalqaro va mintaqaviy siyosatning dolzarb jihatlari yuzasidan fikr almashiladi.
Shuningdek, sammit doirasida qator ikki tomonlama uchrashuvlar o‘tkazilishi rejalashtirilgan.
