Telefonidan nashida topilgan yigitga nisbatan chiqarilgan sud hukmi o‘zgarishsiz qoldirildi
Ayblanuvchi Telegramdagi sinfdoshlar guruhiga Din ishlari bo‘yicha qo‘mitaning xulosasi bilan "aqidaparastlik g‘oyalari bilan yo‘g‘rilgan" deb topilgan diniy qo‘shiq yuborgan
Oliy sud matbuot xizmatning xabar berishicha, bugun, 17-iyul kuni Toshkent viloyat sudida 2002-yilda Toshkent shahrida tug‘ilgan yigitga oid jinoyat ishi uning himoyachilari tomonidan jinoyat ishlari bo‘yicha Oqqo‘rg‘on tuman sudining 8-maydagi hukmi ustidan berilgan apellyatsiya shikoyatlariga asosan apellyatsiya tartibida ko‘rib chiqish bo‘yicha ochiq sud jarayoni yakunlandi.
Unga ko`ra, Toshkent viloyat sudi jinoyat ishlari bo‘yicha sudlov hayʼati apellyatsiya instansiyasining ajrimi bilan birinchi instansiya sudining ayblanuvchiga nisbatan chiqarilgan hukmi o‘zgarishsiz, shikoyatlar esa qanoatlantirilmasdan qoldirildi.
Qayd etilishicha, ushbu ajrim ustidan Oliy sudining Jinoyat ishlari bo‘yicha sudlov hayʼatiga kassatsiya tartibida shikoyat berilishi yoki protest bildirilishi mumkin.
Maʼlumot uchun, 21 yoshli Jahongir Ulug‘murodov 2022-yilda sinfdoshlari mavjud Telegram guruhga YouTube‘dagi diniy qo‘shiq — nashida uchun havola yuborgan. Nashida Din ishlari bo‘yicha qo‘mitaning xulosasi bilan "aqidaparastlik g‘oyalari bilan yo‘g‘rilgan" deb topilgan. Natijada ayblanuvchiga nisbatan 3 yilga ozodlikdan mahrum qilish jazosi tayinlangan.
