Qoraqalpog'istonda ikkita bug'uning jasadi topildi
Hayvonlar brakonyerlar tomonidan qo‘yilgan tuzoqqa tushgan. Brakonyerlar esa voqea joyida o'zlari uchun tashkil qilingan pistirmani payqab, qochib ketishgan.
Ekologiya, atrof-muhitni muhofaza qilish va iqlim o’zgarishi vazirligi ma'lumotlariga ko'ra, 16-iyul kuni soat 06:00 da Qoraqalpog‘iston Respublikasi Quyi Amudaryo davlat biosfera rezervatining Beruniy davlat o‘rmon xo‘jaligi uchastkasida 2 ta Buxoro bug‘usining jasadi topilgan. Ular brakonyerlar tomonidan qo'yilgan tuzoqqa tushgan.
Hayvonlarning nobud bo‘lishiga aloqador shaxslarni aniqlash maqsadida inspektorlar tomonidan voqea joyida pistirma tashkil qilingan. Natijada bir necha soat o‘tgach, niqobli ikki noma’lum shaxs pistirmaga yaqinlashgan, ammo inspektorlarni payqab, voqea joyidan yashirinishgan.
Qayd etilishicha, Quyi Amudaryo qo‘riqxonasi inspektorlarining o‘tkazgan tezkor harakatlari natijasida Beruniy tumani IIB xodimlari bilan hamkorlikda voqeaga aloqador brakonyerlar — Beruniy tumani Biybozor qishlog‘ida yashovchi 1993-yilda tug‘ilgan Sh.A., 1990-yilda tug‘ilgan R. B. va 1985-yilda tug‘ilgan I.D.lar qo'lga olingan.
Hozirda ushbu shaxslarga nisbatan Beruniy tumani IIB tomonidan hayvonlarning nobud bo‘lganligi fakti yuzasidan tergovga qadar tekshiruv ishlari olib borilmoqda.
