Shavkat Mirziyoyev Olmazorga bordi
Prezident Xastimom mahallasida bo‘lib, xonadonlardagi sharoitlar bilan tanishdi hamda aholi bilan suhbatlashdi.
Shavkat Mirziyoyev Toshkent shahri Olmazor tumanidagi Xastimom mahallasida bo‘ldi. Prezident matbuot xizmati xabariga ko'ra, bu yerda 1 ming 500 nafardan ziyod aholi yashaydi. Ularning ko‘pchiligi hunarmandchilik va savdo bilan shug‘ullanadi.
Davlat rahbari xonadonlardagi sharoitlarni kirib ko‘rdi, aholi vakillari bilan suhbatlashdi. Nuroniylarning mahalladagi turmush tarzi, yoshlarning kasb-kori haqida so‘z bordi. Tinchlik-osoyishtalik, xonadonlarga fayzu baraka tilab duo qilindi.
"Maʼlumki, mamlakatimizning barcha hududlarida ’Obod mahalla‘, ’Obod qishloq‘ dasturlari amalga oshirilmoqda. Yo‘llar, muhandislik tarmoqlari taʼmirlanib, xonadonlarga fayz kirmoqda. Bu mahallani ham ’Obod xonadon‘ dasturi asosida yaxshilash ko‘zda tutilmoqda. Har bir insonga munosib sharoit yaratish maqsadimiz va burchimiz", – dedi Prezident.
Davlat rahbari uylarda tashkil etilgan hunarmandlik ustaxonalari va mahalladagi kichik ko‘rgazmani ko‘zdan kechirdi. O‘zini o‘zi band qilishni kengaytirish, turistlar uchun savdo va xizmatlarni yo‘lga qo‘yish bo‘yicha mutasaddilarga topshiriqlar berdi.
