Magistraturaga hujjat topshirishda turk tili bo‘yicha sertifikatlarning qabul qilinmayotgani yuzasidan ma'lumot berildi
Endilikda magistratura qabulida talab etiladigan til sertifikatlari ro’yxatidan chiqarilgan ayrim turk tili bo'yicha sertifikatlar joriy yilgi qabulda ham amal qiladi
Oliy ta’lim muassasalarining magistraturasiga hujjat topshirishda turk tili bo‘yicha ayrim sertifikatlarning qabul qilinmayotgani tarqalgan xabarlar yuzasidan Oliy ta’lim, fan va innovatsiyalar vazirligi rasmiy ma'lumot berdi.
Qayd etilishicha, vazirlikning 2023-yil 23-martdagi buyrug‘i bilan tasdiqlangan ro‘yxatda aks ettirilmagan, ammo 2022-yil 30-iyundagi buyrug‘i bilan tasdiqlangan ro‘yxatdagi 2023-yil 31-martgacha olingan hamda muddati o‘tmagan milliy yoki unga mos darajadagi xalqaro sertifikatlar 2023/2024-o‘quv yili qabulida oliy ta’lim muassasalarining magistratura mutaxassisliklaridagi tanlovda ishtirok etishi uchun inobatga olinadi.
"So‘nggi kunlarda tanlovda ishtirok etish uchun magistr.edu.uz platformasi orqali kiritilgan milliy yoki unga mos darajadagi xalqaro sertifikatlar tegishli rasmiy saytlar orqali tekshirilganda, ular orasida turk tilini bilishni tasdiqlovchi deya taqdim etilgan ayrim hujjatlar til bilish darajasini tasdiqlovchi sertifikatlar emas, balki ayrim o‘quv markazlari tomonidan berilgan til kurslarida o‘qiganligini tasdiqlovchi sertifikatlar bo‘lib chiqmoqda. Shu bois, belgilangan talabga javob bermagan arizalarga rad javobi berilgan", — deyiladi xabarda.
Ma’lumot uchun, abituriyentlar tomonidan taqdim etilgan TYS (Türkçe Yeterlik Sınavı) sertifikati maxus platforma orqali tekshiriladi. Tekshiruv natijasida tasdiqlanmagan sertifikatlar inobatga olinmaydi.
