Notariuslar litsenziyasi amal qilishini to‘xtatib turadigan holatlar ro‘yxati kengaydi

 

Adliya vaziri tomonidan "Qoraqalpog‘iston Respublikasi Adliya vazirligi, viloyatlar va Toshkent shahar adliya boshqarmalari huzuridagi malaka komissiyalari to‘g‘risidagi nizomga o‘zgartirish va qo‘shimchalar kiritish haqida"gi buyruq imzolandi.

 

O‘zgarishlarga ko‘ra, notarius litsenziyasining amal qilishi to‘xtatib turilgan davrda ushbu notarius tomonidan sodir etilgan boshqa qoidabuzarlik uchun malaka komissiyasi tomonidan yangi qaror qabul qilinadi. Bunda, qoidabuzarlik uchun litsenziyaning amal qilishini to‘xtatib turish bo‘yicha qo‘llanilgan yangi muddat dastlabki muddat o‘tishi boshlangan kundan boshlab hisoblanadi.

 

Shuningdek, sodir etilganda litsenziyaning amal qilishini to‘xtatib turadigan qoidabuzarliklar ro‘yxati kengaymoqda:

 

• notarial tasdiqlangan hujjatga uning aniq arifmetik xatolarini tuzatish belgilangan tartibda amalga oshirilmagani – 15 kunga;

• notarial harakatni amalga oshirish turiga rioya etilmagani – 1 oyga;

• notarial harakatlar asosida vujudga keladigan ko‘chmas mulkka nisbatan mulk huquqi va boshqa ashyoviy huquqlar haqidagi maʼlumotlarni Ko‘chmas mulk obyektlariga bo‘lgan huquqlarning davlat reyestriga kiritish uchun davlat ro‘yxatidan o‘tkazuvchi organga yuborilmagani, qonunchilik hujjatlarida yuborilishi belgilanmagan hollar bundan mustasno – 15 kun;

• jinoiy faoliyatdan olingan daromadlarni legallashtirishga qarshi kurashish bo‘yicha ichki nazorat qoidalarga amal qilinmagani – 1 oyga;

• qonunchilik hujjatlarida bajarilishiga to‘g‘ridan to‘g‘ri cheklov mavjud bo‘lgan notarial harakat amalga oshirilgani –  6 oyga;

• notarius tomonidan notarial idora xodimi yoki boshqa shaxsning notarial harakat uchun qonunchilik hujjatlarida belgilanganidan tashqari moddiy manfaat ko‘rishiga yo‘l qo‘yilgani – 4 oyga;

• ish vaqti davomida uzrli sabablarsiz ish joyida bo‘lmagani – 15 kun;

• qonunchilik hujjatlarida nazarda tutilmagan hollarda mol-mulkni boshqa shaxsga o‘tkazishga taqiq qo‘yilgani – 3 oyga;

• notarial faoliyatni tashkil etishga oid minimal talablarning bittasi yoki bir nechtasi bajarilmagani –  15 kunga (agar 15 kunda bartaraf etilmasa, bartaraf etilguniga qadar).