2 viloyatda o‘qishga kiritish bilan bog‘liq jinoyat aniqlandi
Hozirda aniqlangan holatlar bo‘yicha tergov o‘tkazilmoqda.
Buxoro va Samarqand viloyatlarida o‘qishga kiritib qo‘yishni vaʼda qilgan firibgarlar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar bermoqda.
Departamentning Samarqand shahar bo‘limi tomonidan DXX va IIB xodimlari bilan hamkorlikda o‘tkazilgan tezkor tadbirda fuqaro A.N. 2 nafar fuqaroni “Nukus innovatsion instituti” Samarqand filialiga 2-bosqichga o‘qishga kiritib qo‘yish evaziga 1 000 AQSH dollarini olgan vaqtida ashyoviy dalillar bilan ushlangan.
Shuningdek, departamentning Kogon shahar bo‘limi tomonidan IIB xodimlari bilan hamkorlikda o‘tkazilgan tezkor tadbirda fuqarolar G.S. va B.A. fuqaro Z.B.ni tanishlari yordamida G‘ijduvon tumani Abu Ali ibn Sino nomidagi jamoat salomatlik texnikumiga o‘qishga kiritib qo‘yish evaziga 1 000 AQSH dollarini olgan vaqtlarida ashyoviy dalillar bilan ushlangan.
Hozirda mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
