Dam olish kunlari havo harorati pasayadi
"O'zgidromet" dam olish kunlari kutilayotgan ob-havo ma'lumotini e'lon qildi.
"O'zgidromet" ma'lumotlariga ko'ra, bugun va ertaga O‘zbekiston bo‘yicha o‘rtacha issiq ob-havo saqlanib turadi. Havo harorati 35-38 daraja atrofida, ba’zi joylarda 40 darajagacha, janubda ba’zi joylarda 42 darajagacha bo‘ladi.
Respublikaning katta qismida havo asosan biroz bulutli bo‘ladi, yog‘ingarchilik kutilmaydi. Faqat 5-avgust kuni shimoli-g‘arbiy hududlarga janubiy Ural hududlaridan nisbatan nam va salqin havo massalari kirib kelishi boshlanadi.
Natijada Qoraqalpog‘iston Respublikasi va Xorazm viloyatida 5-avgust kuni ba’zi joylarda qisqa muddatli yomg‘ir yog‘ishi, momaqaldiroq bo‘lishi mumkin, havo harorati 32-37 darajagacha pasayadi.
"Respublika hududining katta qismida yog‘ingarchiliksiz ob-havo saqlanib turadi, faqat respublikaning tog‘ oldi va tog‘li hududlarida, shuningdek Buxoro, Navoiy viloyatlarida, kechasi esa Xorazm viloyatida ba’zi joylarda qisqa muddatli yomg‘ir yog‘ishi, momaqaldiroq bo‘lishi mumkin", — deyiladi xabarda.
Ta'kidlanishicha, 6-avgust kuni nisbatan nam va salqin havo massalari kirib kelishi respublikaning barcha hududlariga tarqaladi. Kunduzgi harorat barcha joylarda 30-35 darajagacha, janubda esa 35-38 darajagacha pasayadi.
