Rossiya mudofaa xarajatlarini ikki baravar oshirdi
Mudofaa xarajatlari 2023-yilning dastlabki 6 oyida byudjetga sarflangan barcha pullarning 37 foizini tashkil qilgan.
Rossiya hukumati 2023-yil uchun tasdiqlangan butun harbiy byudjetni yil yakuniga yetmasidanoq sarfladi va Ukrainani zabt etish uchun tashlangan armiyaga sarflashni rejalashtirgan mablag‘ni ikki baravar oshirishga majbur. Bu haqda Reuters hukumatning g‘aznachilik xarajatlari ijrosi bo‘yicha yopiq hujjatlariga tayanib xabar bermoqda.
Agentlikning ta'kidlashicha, dastlabki 6 oyda mudofaa xarajatlari 5,59 trillion rublni yoki byudjetga sarflangan barcha pullarning 37 foizini tashkil qilgan. Shu bilan birga, yil uchun byudjet to'g'risidagi qonunga "milliy mudofaa" moddasi bo'yicha 4,91 trillion rubl kiritilgan — bu bir yil avvalgidan 1,5 barobar ko'p.
Yillik mudofaa xarajatlarining yangi rejasi 9,7 trillion rubl yoki joriy kurs bo‘yicha 102 milliard dollarni tashkil etadi, deb yozadi Reuters. Bu dastlab rejalashtirilganidan deyarli ikki baravar ko'p va barcha byudjet xarajatlarining uchdan bir qismini tashkil etadi — 29,06 trillion rubl.
Umuman olganda, 2023-yilning birinchi yarmida byudjetdan 14,97 trillion rubl sarflangan — bir yil avvalgiga nisbatan 2,44 trillion rubl ko‘p. Bundan tashqari, qo'shimcha xarajatlarning 97 foizi qurol-yarog', armiya va tegishli buyumlar ishlab chiqarishga sarflandi.
Rasmiylar yanvar-iyun oylarida faqat harbiylarning maoshlariga qariyb 1 trillion rubl sarflagan, bu o‘tgan yilning shu davriga nisbatan 543 milliardga ko‘p. Natijada, harbiy xarajatlarning byudjetdagi ulushi mavjud statistik ma'lumotlarning butun davri uchun maksimal darajaga yetdi.
Nashr ma'lumotlariga ko'ra, 2011-yildan 2022-yilgacha Rossiya mudofaaga mamlakat byudjetining 14 foizdan 23 foizgacha mablag'larini sarflagan.
