O'zbekistonda havo harorati pasayadi
"O'zgidromet" kutilayotgan ob-havo ma'lumotlarini e'lon qildi.
"O'zgidromet" ma'lumotlariga ko'ra, bugun O‘zbekiston hududiga Ural hududlaridan kirib kelgan nisbatan salqin havo tarqala boshlaydi va harorat foni respublika bo‘yicha asta-sekin pasayadi.
Qayd etilishicha, dam olish kunlari haroratning asta-sekin pasayishi davom etadi. Yakshanba kuni kunduzgi harorat 30-32 darajadan, janubda 35 darajadan oshmaydi.
Dam olish kunlarida respublikaning katta qismida quruq va kam bulutli ob-havo saqlanib turadi, faqat Toshkent viloyati va Farg‘ona vodiysi viloyatlarining tog‘ oldi va tog‘li hududlarida qisqa muddatli yomg‘ir yog‘ishi, momaqaldiroq bo‘lishi mumkin.
Keyingi haftaning o‘rtasida kunduzgi havo harorati 27-30 darajagacha yanada pasayadi. Ayniqsa kechasi va ertalab havoning salqinlashishi sezilarli bo‘ladi, bunda harorat 13-16 darajagacha pasayadi, deyiladi gidrometeorologiya markazi xabarida.
