"O'zgidromet" hafta davomida kuzatiladigan ob-havo ma'lumotini e'lon qildi
Ushbu hafta davomida harorat foni me’yordan past bo‘ladi. Natijada hafta oxiriga kelib, harorat kechalari 17-20 daraja atrofida bo‘ladi.
"O'zgidromet" ma'lumotlariga ko'ra, bugun va ertaga respublika hududi bo‘yicha salqin ob-havo saqlanib turadi, harorat kechalari 13-16 daraja, kunduz kunlari 27-32 daraja, janubda esa 35 darajagacha bo‘ladi. Qayd etilishicha, bu avgust oyi o‘rtasi uchun me’yoriy qiymatlardan 2-4 darajaga pastdir.
Biroq hafta o‘rtasiga borib salqin havo massasi respublika hududidan asta-sekin chekina boshlaydi hamda harorat ko‘tariladi. Natijada hafta oxiriga kelib, kechalari 17-20 daraja, kunduz kunlari 34-37 daraja atrofida bo‘ladi.
"Ushbu kunlarda hududning katta qismida quruq va kam bulutli ob-havo saqlanib turadi, faqat Farg‘ona viloyatining ayrim tog‘li hududlarida bugun kechga tomon qisqa muddatli yomg‘ir yog‘ishi, momaqaldiroq bo‘lishi mumkin", — deyiladi xabarda.
Shuningdek, 14-15 avgust kunlari respublika bo‘yicha ba’zi joylarda shamol tezligi 15-20 metr/sekundgacha kuchayadi, ayrim joylarda chang-to‘zon bilan kuzatilishi mumkin.
