Kreml Putin va Erdog‘onning uchrashuvi haqida eʼlon qildi
Uchrashuv qachon va qayerda bo‘lib o‘tadi?
Tez orada Turkiya va Rossiya prezidentlari Rajab Toyyib Erdog‘on hamda Vladimir Putin o‘rtasida uchrashuv bo‘lib o‘tadi. Ammo buning aniq qayerda va qachon bo‘lishi keyinroq maʼlum qilinadi, dedi Kreml matbuot kotibi Dmitriy Peskov.
"Uchrashuv tez orada bo‘lib o‘tadi. Bu haqda o‘z vaqtida maʼlum qilamiz", — dedi u brifingda muzokaralar Rossiya hududida bo‘lishi mumkinmi, degan savolga javob berib.
Peskov qo‘shimcha maʼlumot bera olmasligini aytgan.
“Eʼlon qilish sanalari bo‘yicha maʼlum kelishuvlar bor va biz bu kelishuvlarga amal qilish niyatidamiz”, — dedi u.
Shu bilan birga, Kreml vakili Rossiya, Turkiya va Qatar ishtirokidagi don kelishuvi bo‘yicha haligacha aniq kelishuvlar yo‘qligini maʼlum qildi.
Avvalroq OAVda Turkiya prezidenti Rajab Toyyib Erdog‘on Rossiyaga tashrif buyurib, Vladimir Putin bilan uchrashib, g‘alla kelishuvini muhokama qilmoqchi ekanligi haqida xabarlar tarqalgan edi. Bu Putinning o‘zi Turkiyaga borish haqidagi fikrini o‘zgartirgandan keyin sodir bo‘ldi.
