Belarus "Vagner" askarlariga yangi ism-shariflar bilan pasport bermoqda

Bu haqda Belarus muxolifati yetakchisi Pavel Latushko maʼlum qildi.

Uning aytishicha, bu amaliyot bir oydan beri davom etmoqda va bu qo‘poruvchilik hamda teraktlar tayyorlash bilan bog‘liq bo‘lishi mumkin.

Latushkoning so‘zlariga ko‘ra, u hozirgacha nechta yollanma askarga Belarus pasporti berilgani haqida maʼlumotga ega emas. Latushkoning qo‘shimcha qilishicha, yangi pasportga ega bo‘lgan "Vagner" askarlari chegara orqali Yevropa Ittifoqi hududiga ham o‘tishlari mumkin.

Latushkoning taʼkidlashicha, hozirda Belarusda bir necha ming "Vagner" xususiy harbiy shirkati jangarilari mavjud. Mamlakat prezidenti Aleksandr Lukashenko esa ularning sonini yana-da oshirish uchun yetarli moliyaviy resurslarga ega emas. "Shu bois, ularning bir qismi Afrikaga ketadi, ikkinchisi Rossiya Mudofaa vazirligi bilan shartnoma tuzadi, qolganlari esa yo ketishadi yoki Belarusda qoladi", — deydi u.