Qirg‘iziston Prezidenti qatnashgan ko‘pkarida janjal chiqdi
Hozirda holat bo‘yicha surishtiruv boshlangan.
Ijtimoiy tarmoqlarda Qirg‘izistonda ko‘pkari finalidan so‘ng ommaviy tartibsizlik yuzaga kelgani aks etgan videolar tarqaldi.
Maʼlum bo‘lishicha, ommaviy tartibsizliklar ko‘pkari bo‘yicha Qirg‘iziston prezidenti kubogi finalidan so‘ng yuzaga kelgan. Asosiy bahsda «Do‘stuk» va «Intimak» jamoalari qatnashgan. 2:1 hisobida g‘alaba qozonilgan. Ayrim ishtirokchilar hakamning qaroridan norozi bo‘lgan.
Maydondagi o‘yin tugagandan so‘ng odamlar tribunadan yugura boshlagan va ulardan baʼzilari maydonga qarata tosh otgan ham. Ko‘pkari bo‘yicha Prezident kubogi bahsini Sadir Japarovning o‘zi ham tribunadan kuzatib o‘tirgan bo‘lgan.
Milliy xavfsizlik rahbari Qamchibek Tashiyev aybdorlar jazolanishini maʼlum qilgan. O‘sh viloyati ichki ishlar boshqarmasi surishtiruv ishlarini olib bormoqda.
