Hech bir sayyoh bora olmaydigan 6 ta manzil
Sayyoramiz sirli joylarga boy, lekin ayrim hududlarga borish imkonsiz.
Sayyoramiz sirli joylarga boy, u yerga istagingiz qanchalik katta bo‘lsa ham bora olmaysiz. Ayrimlari hayot uchun xavf solishi, ayrimlari boshqa sabablar bilan yopiq. Shunday bo‘lsada, bu sizni ular bilan tanishtirishimizga to‘siq bula olmaydi.
51-hudud
AQSHning Nevada shtatida “51-hudud” nomi bilan mashhur qo‘riqlanadigan joy mavjud. Oddiy odamlardan hech biri u yerda nima borligini aniq bilmaydi. Ammo turli mish-mishlar yuradi.
U yerda harbiy samolyotlar saqlanadi va sinovdan o‘tkaziladi, degan taxmin mavjud. Nevada ustidan noodatiy uchar jismlar ko‘ringandan so‘ng 51-hududda o‘zga sayyoraliklar texnologiyasi sinovdan o‘tadi, degan mish-mish tarqaldi.
Ayni paytda NUJlar bo‘yicha tushuntirish berildi. O‘tgan asr oxirida bu yerda 21 km balandlikka ucha oladigan va radarlar payqamaydigan U-2 josus samolyoti sinovdan o‘tkazilgan. O‘sha davr yo‘lovchi va yuk tashuvchi samolyot pilotlari faqatgina yorqin obyekt va uning zudlik bilan yo‘qolib qolishinigina ko‘rishgan. Aynan shu sababli U-2 NUJga o‘xatilgan. O‘shanda yo‘lovchi samolyotlar 6 km, harbiy samolyotlar 14 km balandlikka ko‘tarila olgan.
Ilonlar oroli
Ilonlar oroli Atlantika okeanida Braziliyadan 35 km masofada joylashgan. Bu yerda ko‘plab turdagi ilonlar yashaydi. Ular orasida dunyodagi eng zaharli botrops iloni ham bor. Hujayralar o‘lishi uchun 1 ta hamlaning o‘zi kifoya qiladi.
Braziliya hukumati orolga borishni taqiqlab qo‘ygan. Bu yerda har bir metr kvadratga 5 ta ilon to‘g‘ri keladi. Taqiqsiz ham bu yerga yurak yutib keladiganlar topilmasa kerak. Ammo qiziquvchan odamlar orolni hech bo‘lmasa qayiq bortidan turib tomosha qilishga kelib turishadi.
Nyu-York markazidagi baxtsizlar oroli
Megapolisning deyarli markazida joylashgan yer ishlatilmaydi, bu yerga sayyohlar ham kelolmaydi. Gap shundaki, North Brother oroli 19 asrdan beri sovuq gap-so‘zlar orasida. O‘sha vaqtlarda orolda vabo, chechak va tifga chalingan bemorlar olib kelinadigan kasalxona joylashgan. U paytda bu kasalliklarning davosi bo‘lmagan, shuning uchun oroldan uyiga qaytganlar juda kam bo‘lgan.
Kasalxona yopilgandan keyin ham bu joyning salbiy obro‘si yo‘qolmadi. 1904 yilda orol sohilida “General Slokam” kemasi halokatga uchradi. Minglab yo‘lovchilar halok bo‘ldi. 20 asr o‘rtalariga kelib, orolda giyohvandlarni davolash uchun reabilitatsiya markazi ochildi. U yerdagi sharoitlar juda og‘ir bo‘lgan. Hozirda orolda hech kim yashamaydi va u yerga borish taqiqlangan.
Vatikan arxivi
Dunyoning eng asosiy xazinalari – Rim papalarining 13 asrdan boshlanadigan hujjatlari va kitoblari saqlanadigan kutubxonaga oddiy odamlarning kirishi mumkin emas. Barcha davrlarning buyuk odamlarining yozishmalari, Salib yurishlari haqidagi maxfiy maʼlumotlar va bir qator sirli hujjatlar kutubxona devorlari ortida saqlanadi. 1881 yilga kelib, ayrim hujjatlarni o‘qish imkoni ochildi, ,ungacha ularni hech kim ko‘rmagan. Kutubxonaga kirish uchun alohida tavsiyanomalarga ega olim bo‘lish kerak. Ikkinchi jahon urushi to‘g‘risidagi ko‘plab hujjatlar hali ham sir saqlanadi.
Vaqt to‘xtab qolgan orol
Albatta, ko‘chma maʼnoda. Gap shundaki, Niixau oroli – Gavaidagi inson yashaydigan eng kichik orol, hozirda bu yerda faqatgina tub aholi yashaydi. Odamlar yuz yil oldingiday hayot kechiradi. Aholining asosiy mashg‘uloti – baliqchilik va dehqonchilik.
Orol 1864 yilda uni sotib olgan Robinsonlar oilasiga tegishli. 1915 yilda ular orolni tashrif buyuruvchilar uchun yopgan. Hatto Gavaya gubernatori ham orolga kirolmaydi. Faqatgina Robinsonlar tomonidan maxsus taklif qilganlargina orol hududiga kirishi mumkin.
Yer yuzidagi eng yosh orol
Islandiya janubida 1963 yilda vulqon otilishi natijasida Syurtsey oroli paydo bo‘ldi, ammo olimlar bu yerga kelishni taqiqlab qo‘yishdi. Orolga oddiy odam oyog‘i yetishi uchun avval mahalliy ekotizim hosil bo‘lishi kerak. Bu yer yuzida hayot qanday bo‘lishini kuzatish mumkin bo‘lgan yagona joy. Syurtsey hosil bo‘lgan dastlabki soatlardanoq unda mikroorganizmlar paydo bo‘lgan. Hozirga kelib orolda bir necha turdagi hasharotlar va qushlar yashaydi.
