Oziq-ovqat evaziga qurol
Putin va Kim Chen Inning taxminiy uchrashuvidan nimalar kutilmoqda?
Amerika ommaviy axborot vositalari Shimoliy Koreya rahbarining Rossiyaga ehtimoliy tashrifi haqida taxmin qilmoqda. Oq uydagi qator manbalar ularga Kim Chen In sentabr oyida Sharqiy iqtisodiy forum o‘tayotgan Vladivostokka borib, yangi ittifoqchisi Vladimir Putin bilan uchrashishini bildirgan.
Tahlilchilarning fikricha, muzokaralar KXDRga oziq-ovqat evaziga Rossiya Federatsiyasiga harbiy yordam ko‘rsatish haqida bo‘ladi.
"Taklif etilayotgan uchrashuv ikki davlat oʻrtasidagi hamkorlikni mustahkamlashi va har ikki tomon uchun ham foyda keltirishi mumkin", — deydi ekspertlar.
Putin armiyasi va Ukrainadagi yurishi uchun o'q-dorilarga muhtoj. Pxenyan esa insonparvarlik va oziq-ovqat yordamiga juda muhtoj, chunki pandemiya mamlakat izolyatsiyasini yanada kuchaytirdi va oziq-ovqat hamda zaruriy tovarlarning halokatli taqchilligiga olib keldi. Bu fikrni Kukmin universiteti (Seul) katta ilmiy xodimi, Shimoliy Koreya tarixi va harbiy ishlari bo‘yicha ekspert Fedor Tertitskiy bildirdi.
Oziq-ovqat evaziga qurol — bu ikki davlat rahbarlarining uchrashuvi bo'lib o'tsa, asosiy muhokama mavzusiga aylanishi mumkin.
Tertitskiy hali ham Vladimir Putin va Kim Chen Inning uchrashuvi bo‘lishiga shubha qilmoqda.
"Si Szinpinning roziligisiz hech narsa bo'lmaydi. Pekin yashil chiroq yoqmasa, hech narsa amalga oshmaydi. Shunga qaramay kelishuvlarga erishilsa, ular katta ehtimol bilan Ukrainadagi urush bilan bog'liq bo'ladi. Biroq ular umuman biror narsada kelishib olishlariga ishonchim komil emas”, — dedi ekspert.
Tertitskiyning soʻzlariga koʻra, Shimoliy Koreyaning maqsadi hech boʻlmaganda Rossiyadan biror narsa olish boʻladi.
So‘nggi 20 yil davomida Rossiya Shimoliy Koreya masalasida Xitoyga ergashdi.
KXDR Rossiyaning Ukrainaga nisbatan pozitsiyasini rasman qo‘llab-quvvatlaganiga qaramay, aslida Rossiya bilan savdo qilmayapti.
Xitoy Shimoliy Koreyaning asosiy savdo sherigi bo‘lib qolmoqda.
Pekin va Moskva yaqin aloqalarni saqlab kelmoqda, bu borada esa Pxenyan Pekinga qattiq bog'liqligicha qolmoqda.
Shu oyda Putin bilan uchrashuv KXDR oliy rahbari uchun ittifoqdoshi va bilvosita Xitoy ustidan ta’sir o‘tkazish uchun imkoniyat bo‘lishi mumkin.
Ukrainadagi harbiy harakatlarni davom ettirish uchun Rossiyaga artilleriya snaryadlari kerak, Shimoliy Koreya esa ularni juda katta miqdorda ishlab chiqarishga qodir.
"Shimoliy Koreya ulkan harbiy sanoatga ega. Ishlab chiqarish hajmi ulkan. Artilleriya esa Rossiya uchun juda muhim. Shuning uchun Moskva qurol evaziga to'g'ridan-to'g'ri biror narsa yetkazib berishga rozi bo'ladi. Ayniqsa u ancha eskirgan uskunalardan foydalanayotgan bir sharoitda" — dedi ekspert.
Tertitskiyning fikricha, Pxenyan va Moskva o‘rtasidagi kelishuv Ukrainadagi harbiy harakatlar yo‘nalishini sezilarli darajada o‘zgartira olmaydi, chunki Shimoliy Koreyaning Rossiyaga yordam berishga tayyorligi “Ukrainaga G‘arbning yordamini oshirishga undaydi”.
Biroq Shimoliy Koreya qurollarining jang maydonida paydo bo'lishi bilan mojaro yanada shiddatli tus olishi mumkin.
