Yaponiya ilk bor Oyga qo‘nadigan modulini uchirdi
Missiya doirasida Yaponiya Oy mantiyasining tog‘ jinslarini o‘rganish niyatida.
Yaponiya aerokosmik tadqiqotlar agentligi (JAXA) tomonidan ishlab chiqilgan birinchi SLIM Oyga qo‘nish apparati koinotga uchirildi. Raketa-tashuvchi Kagosima prefekturasi janubidagi Tanegasima kosmik markazidan 7 sentabr kuni mahalliy vaqt bilan soat 08:42 da (Toshkent vaqti bilan 04:42) uchdi. Uchirish ob-havo sharoiti tufayli bir necha bor qoldirilgandi.
Modulning Yer sunʼiy yo‘ldoshi yuzasiga qo‘nishi uchirilgan paytdan boshlab 4-6 oy ichida kutilmoqda. Missiya doirasida zond kaft o‘lchamidagi vezdexod (har qanday yo‘lda yoki yo‘lsiz joylarda ham yura oladigan texnika) va multispektral kamera yordamida hozirgacha kam o‘rganilgan Oy mantiyasining tarkibini tahlil qiladi.
Qurilmani ishlab chiqishda qo‘llaniladigan texnologiyalar maʼlum bir joyga 100 metrdan ortiq bo‘lmagan xato bilan qo‘nish imkonini beradi. AFP agentligining qayd etishicha, Oyga avvalgi qo‘nishlarda bu ko‘rsatkich bir necha kilometrga yetgan.
"Insoniyat nafaqat oson bo‘lgan joyga, balki endi o‘zi xohlagan joyga qo‘na oladi", — deya maʼlum qildi JAXA parvozdan oldin.
Eslatib o‘tamiz, ikki hafta oldin Hindiston kosmik kemasi "Chandrayan-3" missiyasi doirasida Oy yuzasiga muvaffaqiyatli qo‘ndi. Hindiston Yer sunʼiy yo‘ldoshi yuzasiga kosmik kemani qo‘ndirgan to‘rtinchi davlatga aylandi. Ilgari Sovet Ittifoqi, AQSH va Xitoy bunga erishgan. Ayni vaqtda Rossiyaning "Luna-25" stansiyasi avgust oyi oxirida Oyga qo‘nmoqchi bo‘lgan vaqtda halokatga uchragandi.
