Armanistonda Sputnik sharhlovchisi va bloger hibsga olindi
Armaniston Tergov qo‘mitasi maʼlumotlariga ko‘ra, ular “o‘qotar qurollarning noqonuniy savdosi” moddasi bilan qo‘lga olingan.
Sputnik Armaniston sharhlovchisi Ashot Gevorkyan va Rossiyaga xayrixoh bloger Mikayel Badalyan Armaniston janubidagi Goris shahrida qo‘lga olindi. Bu haqda Sputnik Armaniston xabar berdi.
Armaniston Tergov qo‘mitasi maʼlumotlariga ko‘ra, Badalyan va Gevorkyan “o‘qotar qurollarning noqonuniy savdosi” moddasi bilan qo‘lga olingan.
Rossiya TIV rasmiy vakili Mariya Zaxarova ularning hibsga olishiga munosabat bildirdi.
“Bu Yerevanda Rossiya — Armaniston media-forumi o‘tkazilishi munosabati bilan navbatdagi provokatsiya ekani istisno qilmayman. Ikki davlat o‘rtasidagi munosabatlarni buzishni istayotganlarning provokatsiyasi. G‘arb esa bunga ko‘p sarmoya kiritmoqda”, — deya yozdi Zaxarova o‘zining Telegram-kanalida.
Sputnik Armaniston xabariga ko‘ra, Gevorgyan chegara hududlaridagi hayot haqida o‘zining “Biz” (“Mi”) nomli mualliflik loyihasi uchun radiomateriallar tayyorlash uchun Syunik shahriga borgan.
“Biz Sputnik Armaniston sharhlovchisi Ashot Gevorkyanning hibsga olinishini kuzatmoqdamiz. Jurnalistning hibsga olinishi, ayniqsa Armaniston-Rossiya media forumi paytida, eng ishonchli asoslarni talab qiladi. Biz barcha protsessual meʼyorlarga rioya qilish va tergovning xolisligiga umid qilamiz”, — deya maʼlum qilgan “Rossiya segodnya” matbuot xizmati.
Shuningdek, qardosh Rossiya va Armaniston xalqlari o‘rtasidagi do‘stlikka putur yetkazish bo‘yicha ehtimoliy provokatsiyalarga zudlik bilan chek qo‘yish zarurligi taʼkidlangan.
O‘z navbatida, Gevorkyanning advokati u noqonuniy qurol savdosi bo‘yicha qo‘zg‘atilgan jinoiy ishga aloqasi yo‘qligini maʼlum qilgan. Advokat Gevorkyan ham Badalyan kabi 72 soatga — qonunda ko‘zda tutilgan muddatga hibsga olinganini taʼkidlagan.
