Gurjiston prezidenti isteʼfoga chiqmasligini maʼlum qildi
Mamlakat hukmron partiyasi 1 sentyabrda Prezidentga nisbatan impichment jarayonini boshlaganini eʼlon qilgandi.
Gurjiston prezidenti Salome Zurabishvili hukmron partiyaning unga nisbatan impichment eʼlon qilishga urinishlari fonida isteʼfoga chiqmoqchi emasligini aytdi.
Bu haqda u Gurjiston jamoat teleradiokompaniyasining Birinchi kanali orqali efirga uzatilgan telemurojaatida aytdi.
"Men hech qayerga ketmayman... Hamma mening isteʼfoga chiqishim bo‘yicha umidlarni unutishi kerak", — deya taʼkidladi Zurabishvili.
Zurabishvili faqat Gurjiston xalqi oldida javob berishi va safarlarni shaxsiy mablag‘i hisobiga amalga oshirayotganini taʼkidladi.
"Men faqat sizning oldingizda javob beraman, chunki siz meni tanladingiz va bu tanlov uchun men katta masʼuliyatni his qilyapman. Siz meni tanladingiz, men butun umrim davomida Yevropa tarafdori bo‘lib kelganman, Gurjistonning Yevropa kelajagini qo‘llab-quvvatlaganman", — deya qo‘shimcha qildi u.
Eslatib o‘tamiz, mamlakat hukmron partiyasi — "Gurjiston orzusi" 1-sentabrda Prezidentga nisbatan impichment jarayonini boshlaganini eʼlon qilgandi.
