Rossiyalik dasturchi va xakerlar tufayli Turkiyada kiberjinoyatlar soni oshdi
Migrant xakerlar dastlab mahalliy xakerlar bilan hamkorlikda kichik onlayn firibgarliklar bilan shug‘ullangan. So‘ng o‘g‘irlangan maʼlumotlarni Yevropa bozorida sotishgan va ulardan tushgan daromadlarni qonuniylashtirishgan.
Financial Times nashrining maʼlum qilishicha, Rossiya Federatsiyasida harbiy xizmatga qisman safarbarlik boshlanganidan keyin kelgan rossiyalik dasturchi va xakerlar tufayli Turkiyada kiberjinoyatlar soni oshdi.
Nashrning manbalarga tayanib yozishicha, rossiyalik migrant xakerlar dastlab mahalliy xakerlar bilan hamkorlikda kichik onlayn firibgarliklar bilan shug‘ullangan, o‘g‘irlangan maʼlumotlarni Yevropa bozorida sotishgan va ulardan tushgan daromadlarni qonuniylashtirishgan.
Yaqinda Turkiya politsiyasi tergov boshlashga qaror qildi, chunki rossiyalik va mahalliy xakerlar bir-birining kuchli tomonlaridan foydalanib ish tutadigan kiberjinoiy guruhlar tuza boshlagan.
Ismi sir qolishini istagan kiberxavfsizlik bo‘yicha mutaxassisning nashrga aytishicha, rossiyalik xakerlar turkiyalik hamkasblarini katta hajmdagi maʼlumotlar bilan ishlashga o‘rgatgan va G‘arbiy Yevropadagi aloqalari orqali foydali bitimlar tuzishga boshchilik qilishgan.
Manbaning taʼkidlashicha, xakerlar o‘g‘irlangan kriptovalyutani turk lirasiga aylantirish, Turkiya fuqaroligini olish uchun ko‘chmas mulk sotib olish yo‘llari va boshqa masalalardagi kiberjinoyatlarni ham amalga oshira oladi.
