Estoniya va Latviya "Osmon qalqoni" tashabbusiga qo‘shiladi
Ikki Boltiqbo‘yi davlati Yevropa havo hujumidan mudofaa tizimini yangilash tashabbusiga qo‘shilish niyati to‘g‘risidagi deklaratsiyani imzoladi.
Estoniya va Latviya havo hujumidan mudofaa tizimini yangilash uchun Germaniya tomonidan boshlangan «Yevropa osmon qalqoni» tashabbusiga (European Sky Shield Initiative) qo‘shilmoqda. Ikki mamlakat mudofaa vazirlari Xanno Pevkur va Inara Murniyetse germaniyalik hamkasbi Boris Pistorius ishtirokida ushbu loyihaga qo‘shilish niyati to‘g‘risidagi deklaratsiyani imzoladi. Bu haqda Germaniyaning Diehl Defence mudofaa kompaniyasi matbuot xizmati xabar berdi.
Bundan tashqari, Estoniya va Latviya birgalikda IRIS-T SLM yerusti o‘rta masofali havo mudofaa tizimlarini sotib olish niyatida, dedi Pistorius. Uchrashuvda ularni ishlab chiqaruvchi Diehl Defence kompaniyasi bilan ham tegishli shartnoma imzolandi.
Nemis kompaniyasi ikki Boltiqbo‘yi mamlakati uchun bu 30 yildan ortiqroq vaqt oldin mustaqillikka erishganidan beri eng yirik mudofaa sarmoyasi ekanini taʼkidladi.
«Xaridlar kuchli raqobat sharoitida rekord surʼatda amalga oshirildi, bu bizga kerakli imkoniyatlarni eng qisqa vaqt ichida va juda hamyonbop narxda taqdim etish imkonini berdi. Bu jarayon murakkab talablarni ishlab chiqishda Estoniya va Latviya tashkilotlari o‘rtasidagi hamkorlikni o‘z ichiga oldi. Endi 2025 yilda birinchi tizimlarni yetkazib berish va ishga tushirishni kafolatlash uchun loyihani puxta boshqarish talab etiladi», — dedi xaridlar jarayonini boshqarayotgan Estoniya Mudofaa investitsiya markazi (ECDI) bosh direktori Magnus-Valdemar Saar.
