Kim Chen In Rossiya g‘alabasi uchun qadah ko‘tardi
Putin va KXDR rahbari uchrashuvi tafsilotlari.
Bugun barcha siyosatchilar, ekspertlar, OAVning eʼtibori Rossiyaga qaratildi. Pezident Vladimir Putin KXDR yetakchisi Kim Chen In bilan uchrashdi. Putin hamkasbi Kim Chen Inni Amur viloyatidagi «Vostochniy» kosmodromida kutib oldi.
Uchrashuv marosimi texnik majmuaning raketa-tashuvchilarni o‘rnatish va sinovdan o‘tkazish binosiga asosiy kirish eshigida bo‘lib o‘tdi. Shimoliy Koreya yetakchisi taklif uchun Vladimir Putinga minnatdorchilik bildirgan.
“Jang bilan band bo‘lishingizga qaramay, bizni taklif qilganingiz uchun tashakkur”, dedi In.
Majmua bilan tanishgach, tomonlar muzokaralarni boshlagan. Tantanali qabul chog‘ida Shimoliy Koreya yetakchisi In Rossiyaning g‘alabasi, uning prezidenti Vladimir Putin hamda Rossiya-Koreya munosabatlarining mustahkamlanishi uchun qadah ko‘tardi.
“Rossiya Federatsiyasining hurmatli Prezidenti, o‘rtoq Vladimir Vladimirovich Putinning mustahkam sog‘lig‘i, buyuk Rossiyaning yangi g‘alabasi, rus-koreya do‘stligining uzluksiz rivojlanishi va mustahkamlanishi, barchaning salomatligi uchun qadah ko‘tarishni taklif qilaman”, — dedi Kim Chen In.
KXDR rahbari, shuningdek, Rossiya prezidenti bilan barqaror munosabatlarni o‘rnatishga, ular asosida kuchli davlatlar barpo etilishini rag‘batlantirishga hamda xalqaro adolatni himoya qilishga tayyorligini bildirdi.
Dastlab tomonlar delegatsiyalar ishtirokida suhbatlashdi, keyin esa yuzma-yuz formatda. Kun tartibidan ikki tomonlama hamkorlik masalalari, jumladan, savdo-iqtisodiy aloqalar va madaniy almashinuvlar, shuningdek, mintaqadagi hamda butun dunyodagi vaziyat joy oldi.
Uzoq Sharq mintaqasidagi vaziyat, umuman Rossiya hamda Koreya Xalq Demokratik Respublikasi o‘rtasidagi ikki tomonlama munosabatlar yuzasidan ochiq fikr almashilgani maʼlum qilindi.
“KXDR Rossiya bilan aviatsiya, transport va infratuzilma sohasida hamkorlik qilish imkoniyatidan manfaatdor, o‘tgan muzokaralar juda mazmunli bo‘ldi”, dedi Rossiya prezidenti matbuot kotibi Dmitriy Peskov.
Putin KXDR yetakchisi Kim bilan qishloq xo‘jaligi sohasidagi munosabatlarni rivojlantirishni muhokama qilganini aytdi.
“Biz qishloq xo‘jaligini rivojlantirish haqida gaplashdik va bu borada albatta taklif qiladigan narsamiz bor. Biz mamlakatga insonparvarlik yordami ham ko‘rsatamiz. Ammo insonparvarlik yordamidan tashqari oddiygina teng sharoitlarda ishlash imkoniyati ham bor”, — dedi Putin.
Shuningdek, Kreml rahbari transport aloqalari va logistika bilan bog‘liq boshqa qo‘shma loyihalarni ham aytib o‘tdi.
Shunday qilib, «Vostochniy» kosmodromidagi muzokaralar yakunlandi. Avvalroq prezident matbuot kotibi Dmitriy Peskov uchrashuv yakunlari bo‘yicha matbuot anjumanlari yoki hujjatlar imzolanishi rejalashtirilmaganini maʼlum qilgandi.
Putin va In o‘rtasidagi muzokaralarni ayniqsa AQSH, Yaponiya, Janubiy Koreya kabi davlatlar diqqat bilan kuzatdi. G‘arbning ishonchi komilki, Moskva oziq-ovqat va texnologiya evaziga Shimoliy Koreyadan o‘q-dorilar olmoqchi.
Kuzatuvchilar uchrashuv joyining o‘zi ramziy maʼnoga ega ekanligini taʼkidlamoqda. Rossiya ommaviy axborot vositalarining yozishicha, muzokaralar boshlanishidan avval ikki davlat rahbarlari yangi “Angara” raketasini yig‘ish jarayoni bilan tanishgan, shuningdek, “Soyuz-2” tashuvchi raketasini uchirish majmuasini ko‘zdan kechirgan. G‘arb ekspertlari Shimoliy Koreya o‘zining ayg‘oqchi sunʼiy yo‘ldosh dasturini ishlab chiqishi va yangi raketa texnologiyalarini qo‘lga kiritish istagiga ishora qilmoqda.
“The New York Times” gazetasi Moskva Pxenyandan sovet tomonidan ishlab chiqarilgan artilleriya snaryadlari va tankka qarshi raketalarni olishga umid qilayotganini yozdi.
KXDR rahbari Rossiyaga prezident Putinning taklifiga binoan kelgan. Uning tashrifi rasmiy maqomga ega — bu protokol amaliyotidagi eng yuqori toifalardan biridir. Bungacha Kim Chen In Rossiyaga 2019 yilning aprel oyida kelgan edi.
