Buxoroda 125 tup daraxt kesib tashlandi
Bu bilan tabiatga 1,7 milliarddan ortiq zarar yetkazilgan.
Mamlakatimizda "Yashil makon" umummilliy loyihasi doirasida yiliga 200 million tup daraxt va buta ko‘chatlarini ekish va bu orqali respublikamizda yashil maydonlarni ko‘paytirish borasida keng ko‘lamli ishlar amalga oshirilmoqda.
Afsuski, daraxt va butalarni noqonuniy kesish holatlari juda tez-tez uchramoqda.
Xususan, Peshku tumanining “Mustaqillik”, “Chig‘irchi”, “Yangibozor”, “Sadir” va “Malishoyak” mahallalari hududidan oqib o‘tuvchi “Zandani” kanalining muhofaza zonasida o‘sib turgan jami 125 tup daraxt, shundan 23 tup kam qimmatli, 102 tup qimmatbaho daraxtlar kesilgan.
Dastlabki xulosaga ko‘ra, hududda daraxtlar kesilishi oqibatida tabiatga 1,7 mlrd. so‘mdan ortiq juda ko‘p miqdordagi zarar yetkazilgan.
Aniqlangan qonun buzilishi holatlari yuzasidan Buxoro viloyati prokuraturasi tomonidan jinoyat ishi qo‘zg‘atilib, dastlabki tergov harakatlari o‘tkazish uchun ichki ishlar organlariga yuborildi.
Mazkur jinoyat ishi tergovi ustidan prokuror nazorat o‘rnatilgan.
