Angrenda bolalar zaharlangan bog‘cha yopildi
Sanepidqo‘mita holat bo‘yicha qo‘shimcha maʼlumot berdi.
Avvalroq Toshkent viloyatining Angren shahridagi 10-sonli maktabgacha taʼlim tashkilotida tarbiyalanayotgan bolalarning ovqatdan zaharlangani xabar qilingandi. Holati bo‘yicha Sanepidqo‘mita qo‘shimcha maʼlumot berdi.
Qayd etilishicha, 13 sentyabr kuni soat 14:00 dan boshlab 14 sentyabr kuni soat 21:00 ga qadar 10-sonli DMTTda tarbiyalanayotgan bolalar ko‘ngil aynishi, qayd qilish, tana haroratni ko‘tarilishi, tez-tez ich kelishi kabi shikoyatlar bilan murojaat qilgan. Ulardan 24 nafari “Ovqatdan zaharlanish yoki oshqozon faoliyatining funksional buzilishi” birlamchi tashxisi bilan yotqizilgan, 7 nafariga birlamchi tibbiy yordam ko‘rsatilib, uyiga ruxsat berilgan.
Laborator tekshiruvlar uchun yuqumli kasalliklar bo‘limiga murojaat qilgan bemorlardan hamda DMTT omborxonasida saqlanayotgan oziq-ovqat mahsulotlaridan namunalar olingan.
“DMTTning 240 nafar tarbiyalanuvchilari shifokorlar tomonidan to‘liq tibbiy ko‘rikdan o‘tkazildi va tibbiy nazoratga olindi. DMMTning ish faoliyati vaqtinchalik to‘xtatildi”, — deyiladi xabarda.
