Baydenning o‘g‘li 25 yilga qamalishi mumkin
Xanter Bayden qurolga noqonuniy egalik qilishda ayblanmoqda.
AQSH tarixida ilk bor Adliya vazirligi amaldagi prezidentning o‘g‘liga ayblov eʼlon qildi. Jo Baydenning o‘g‘li Xanterga 2018 yilda sotib olingan o‘qotar qurollarni xarid qilayotganda yolg‘on ko‘rsatma berganlikda uchta ayblov qo‘yildi.
Ayblovlar iyul oyida Xanter Baydenning dastlabki ayblov kelishuvi muvaffaqiyatsizlikka uchraganidan keyin qo‘yilgan. Bu Jo Baydenning 2024 yilda AQSH prezidenti lavozimiga qayta saylanish kampaniyasi o‘rtasida jiddiy sud jarayoniga olib kelishi mumkin.
Xanter Baydenning huquqiy muammolari 2018 yil oktyabrda sotib olgan o‘qotar qurollardan kelib chiqdi. Delaverdagi qurol do‘konidan revolver sotib olayotganda, u hech qanday noqonuniy giyohvand moddalarni isteʼmol qilmagani yoki ularga qaram bo‘lmaganligini aytib, federal blankda yolg‘on gapirgan. Garchi, aslida, sotib olish paytida u kokainga qaramlik bilan kurashgan.
O‘qotar qurol sotib olish yoki unga egalik qilish uchun blankalarni to‘ldirishda yolg‘on bayonot berish federal jinoyat hisoblanadi. Agar Xanter Bayden aybdor deb topilsa, 25 yilgacha qamoq jazosiga hukm qilinishi mumkin.
CNN taʼkidlashicha, o‘zi to‘rt marta ayblangan AQSHning sobiq prezidenti Donald Tramp Xanter Bayden haqidagi xabarni «qayg‘uli vaziyat» deb atagan.
"Bu qayg‘uli vaziyat, demoqchimanki, bundan hech kim xursand bo‘lmasligi kerak", — degan Tramp.
AQSH Kongressi Vakillar palatasi avvalroq prezident Baydenning o‘g‘lining biznes faoliyati bilan bog‘liq ravishda impichment jarayonini boshlashi mumkin bo‘lgan tergov boshlanganini maʼlum qilgandi.
