Yaponiyada shovqinni tokka aylantiruvchi modul yaratildi
Unga hech qanday rozetka yoki batareya kerakmas.
Sony elektromagnit shovqinni energiyaga aylantirib beruvchi kompakt modulni taqdim qildi, deya yozmoqda “Xabar.uz” nashri.
Elektromagnit shovqin — turli elektron qurilmalardan taraladigan elektromagnit to‘lqinlar. Odatda bu shovqin foydasiz hisoblanadi. Biroq yaponlar uni foydali qilishni uddalashgan ko‘rinadi.
Modul narsalar internetida ishlatiladigan qurilmalarning metall qismlaridan antenna sifatida foydalanadi, antenna bir necha gersdan 100 MGs.gacha diapazondagi elektromagnit to‘lqinlarini tutadi. So‘ngra modul bu to‘lqinlarni keyinchalik IoT-qurilmalarni quvvatlantirishda ishlatish mumkin bo‘lgan doimiy tokka aylantirib beradi. Hech qanday rozetka yoki batareya kerakmas.
Texnologiya hozircha ishlanish bosqichida, Sony uning asosida mahsulotlar ishlab chiqarish uchun turli sohalardagi kompaniyalar bilan hamkorlik qilishni rejalashtirgan.
