"Barcha muqaddas kitoblar vandalizmdan qonuniy himoyalangan bo‘lishi kerak"
Qozog‘iston prezidenti BMT minbarida Qurʼonning yoqib yuborilishi yuzasidan bayonot berdi.
BMT Bosh Assambleyasining 78-sessiyasida nutq so‘zlagan Qozog'iston prezidenti Qosim-Jomart To‘qayev Qurʼonning yoqib yuborilishi yuzasidan fikr bildirdi.
“So‘nggi paytlarda muqaddas kitoblarga hurmatsizlik holatlari kuzatilmoqda. Biz bu vaziyatdan xavotirdamiz. Islom va boshqa dinlarga qarshi bunday harakatlardan erkinlik, so‘z erkinligi va demokratiya ramzini ko‘rib bo‘lmaydi. Qurʼoni Karim kabi barcha muqaddas kitoblar vandalizmdan qonuniy himoyalangan bo‘lishi kerak”, — dedi u.
Shu bilan birga, Davlat rahbari Qozog‘iston kelgusi yil Kelajak sammitida yordamchi rol o‘ynashini taʼkidladi.
“Biz Bosh kotib tomonidan taklif etilgan “Yangi tinchlik kun tartibi”ni qo‘llab-quvvatlaymiz. Ushbu strategik hujjat dunyoda keng tarqalgan ishonchsizlik va nafratga qarshi turishi kerak. Qozog‘iston kelgusi yil Kelajak sammitida Kelajak paktining qabul qilinishida konstruktiv va qo‘llab-quvvatlovchi rol o‘ynaydi. Ammo tinchlik faqat qurolni taqiqlash yoki deklaratsiya imzolash bilan bo‘lmaydi. Dinlararo va konfessiyalararo muloqot tinchlik madaniyatini shakllantirishda muhim o‘rin tutadi”, – dedi To'qayev.
