O‘zbekiston fuqaroligiga ega bo‘lmaganlar soni ochiqlandi
Bu Markaziy Osiyo mintaqasidagi davlatlar orasida eng katta ko‘rsatkich ekani aytilmoqda.
O‘zbekistonda 2023-yil birinchi yarmidagi holatga ko‘ra, 25 ming 413 nafar fuqarolikka ega bo‘lmagan shaxs yashaydi.
Bu haqda 20-sentabr kuni Toshkent shahrida Fuqarolikka ega emaslik masalalari bo‘yicha tahliliy ma’ruza va Parlamentlararo Ittifoq hamda BMT Qochoqlar ishlari bo‘yicha oliy komissari boshqarmasining parlament a’zolariga mo‘ljallangan fuqarolik va fuqarosizlik masalalariga oid yo‘riqnomasi o‘zbek tilidagi nashrining taqdimotida aytib o‘tilgan.
Ta'kidlanishicha, bu Markaziy Osiyo mintaqasidagi davlatlar orasida eng katta ko‘rsatkich bo‘lib, ayni shaxslarning aksariyati sovet ittifoqi sobiq fuqarolari va ularning avlodlari hisoblanadi.
O‘zbekiston Milliy markazi direktori Akmal Saidov hukumat mamlakat hududida fuqarolikka ega emaslik holatlarini kamaytirish va tugatish yo‘lida qat’iy qadamlar qo‘yayotganini qayd etdi. O‘zbekistonda 2014-yildan e’tiboran yuz ming nafardan ortiq shaxsning fuqarolikka ega emasligi aniqlangan bo‘lib, o‘tgan davrda shundan 83 ming 793 nafarining bu muammolari ijobiy hal etilgan.
