O‘zA va “Sharq” nashriyoti binosini sotuvga qo‘ygan Davaktivga ogohlantirish berildi

 

“Sharq” nashriyoti va O‘zA binosi Davlat aktivlarini boshqarish agentligining elektron savdo platformasi orqali sotuvga qo‘yilgandi. Madaniy meros agentligi ularni sotuvdan olish bo‘yicha ogohlantirish berilganini maʼlum qildi.

 

Toshkent shahri, Mirobod tumani, Buyuk Turon ko‘chasi, 41 hamda 42-uy manzilida joylashgan mulkiy majmualar 20-sentabr kuni “E-auksion” elektron savdo platformasi orqali sotuvga qo‘yilgandi.

 

Madaniy meros agentligining bildirishicha, Buyuk Turon ko‘chasi, 41-uy manzilida joylashgan binolar (“Sharq” nashriyoti matbaa korxonasi AJ binolari) Vazirlar Mahkamasining 2019 yildagi qarori bilan Moddiy madaniy merosning ko‘chmas mulk obyektlari milliy ro‘yxatiga madaniy meros obyekti sifatida kiritilgan. Obyekt 1979—1983 yillarda qurilgan jami 14 ta bino, 2 ta bino qismi hamda 5 ta inshootdan iborat bo‘lib, umumiy maydoni 60 736,0 kvadrat metrni tashkil etadi.

 

“Madaniy meros obyektlarini muhofaza qilish va ulardan foydalanish to‘g‘risida”gi qonunning 23-moddasiga muvofiq Davlat mulkida turgan moddiy madaniy meros obyektlari davlat tasarrufidan chiqarilishi va xususiylashtirilishi mumkin emasligi belgilangan.

 

Shuningdek, “Davlat mulkini boshqarish to‘g‘risida”gi qonunining 19-moddasi uchinchi xatboshiga asosan moddiy madaniy meros obyektlari, arxiv hujjatlari, davlat muzeylari va muhofaza etiladigan tabiiy hududlar, shu jumladan, xiyobonlar va botanika bog‘lari xususiylashtirilmaydigan davlat mulklari etib eʼtirof etilgan.

 

“Yuqoridagilarni inobatga olgan holda Madaniy meros agentligi tomonidan Davlat aktivlarini boshqarish agentligiga ushbu madaniy meros obyektini auksion savdolaridan olib tashlash yuzasidan 21-sentabr kuni ogohlantirish berildi”, — deyiladi agentlik xabarida.

 

Xabarda ushbu holat natijasi yuzasidan kelgusida qo‘shimcha maʼlumot berilishi bildirilgan.