Oddiy, kamtar va hashamatsiz hayot — “o‘zga sayyoradan kelgan” prezidentlar

 

Bu ikki ayol ham Prezident. Chapda Mayya Sandu — Moldova Respublikasi Prezidenti, o‘ngda Halima Yoqub — Singapur sobiq Prezidenti.

 

Ayol kishi sifatida ularning bir-biriga o‘xshash jihatlari ko‘p. Ammo erkaklardan farqli o‘laroq ulardagi asosiy o‘xshashlik — ular Prezident bo‘lsalar ham xalqining hisobidan alohida samolyotlarda emas, hamma qatori birdek yo‘lovchi reyslarda parvoz qilishadi. Hashamatli va shohona hayotdan ko‘ra, oddiylikni xush ko‘rishadi.

 

Shu jihatdan ularni bugungi zamonning buyuk yetakchilari deyish mumkin.

 

Qorovulning prezident qizi

 

Halima Yoqub  — Singapurning ilk ayol prezidenti. Uning otasi Yoqub hind musulmoni bo‘lib, qorovullik qilgan. Onasi esa malay millatiga mansub, ko‘chada ovqat pishirib sotgan. Halima 8 yoshligida otasi yurak xurujidan vafot etgan. Yoshlikdagi o‘ta og‘ir qiyinchilik uni ilmga bo‘lgan muhabbatiga zarracha xalaqit qilmaydi. U ilm ortidan eng yuqori lavozimgacha yetib kelgan va Singapurning ilk ayol prezidenti sanaladi.

 

 

Singapur Prezidenti, Bosh vaziri va rasmiy shaxslari odatda qaysidir davlatga safar qilsa, doimiy yo‘lovchi reyslarga chiqishadi. Chipta pulini o‘z cho‘ntaklaridan to‘laydi va samolyotda boshqa yo‘lovchilar bilan birga o‘tiradi. Хususan, Halima Yoqub joriy yilning 23 may kuni rasmiy tashrif bilan O‘zbekiston (Toshkent)ga kelganda UzAirways‘ning doimiy reysida yetib kelgan. Samarqandga ham poyezdda borgan. Eng hayratlanarlisi, Singapur sobiq prezidenti Halima Yoqub turmush o‘rtog‘i Muhammad Abdulla Alhabshi bilan O‘zbekiston poytaxtidagi restoranlardan biriga tashrif buyurgan. Ular u yerda O‘zbekiston rasmiy vakillari ishtirokisiz kechki ovqat tanovul qilgan, musiqachilar bilan suratga tushgan. Mehmonlar kitobiga esa: “Ajoyib kechki ovqat, musiqa va atmosfera uchun rahmat. Bizga kechki ovqat juda yoqdi”, — degan yozuv qoldirgan.

 

 

Ayni paytda 68 yoshda bo‘lgan Halima Yoqub karyera bilan bir qatorda, oilaviy hayotini ham yaxshi izga solgan. Talabalik davrida Muhammad Abdulla Al Hashbi ismli insonga turmushga chiqqan va bugungi kunda ular besh farzandning ota-onasi.

 

Asl kasbi iqtisodchi Prezident

 

Mayya Sandu Moldovaning amaldagi prezidenti. U ham Halima Yoqubdek mamlakat tarixidagi ilk ayol prezident hisoblanadi. Mayya Sandu mamlakatning shimoli-g‘arbiy qismidagi Ruminiya bilan chegaradosh Moldova Falest tumanidagi qishloqlardan birida tug‘ilgan. Onasi maktabda o‘qituvchi, otasi esa veterinar bo‘lgan. Oddiy qishloq qizi OLiy taʼlimni iqtisod yo‘nalishi bo‘yicha o‘qib, keyinchalik G‘arb davlatlaridagi nufuzli oliygohlarda ham tahsil olgan.

 

U faoliyatini 1994 yilda Moldova Iqtisodiyot vazirligining tashqi iqtisodiy munosabatlar departamentida bosh mutaxassis lavozimidan boshlagan. 1996 yilda esa Iqtisodiyot vazirligi bosh boshqarmasi rahbarining maslahatchisi va tez orada amalda o‘rinbosari bo‘lgan. Shuningdek, Jahon bankining Moldovadagi vakolatxonasida maslahatchi, so‘ngra iqtisodchi lavozimida ishlagan.

 

 

2016 yilda ilk marta Moldova prezidenti saylovida o‘z nomzodini ko‘rsatadi. O‘sha paytda Sandu mamlakatning o‘ng-markaz muxolifat kuchlaridan yagona nomzod bo‘lgan va 38,71 foiz ovoz bilan ikkinchi turga chiqib, ikkinchi o‘rinni egallagan. 2020 yil 15 noyabrda bo‘lgan Moldova Respublikasi prezidentligiga nomzodini qayta qo‘yadi va g‘alaba qozonadi. 

 

 

Mayya Sandu hozir 51 yoshda. U turmushga chiqmagan. U Kishinevda taxminan 70 kvadrat metr bo‘lgan ikki xonali uyda yashaydi.

 

 

U prezidentlikka saylanmasidan avval OAVga bergan intervyusida davlat pullarini turar-joylarga sarflamasligini aytgan. 

 

U ilk rasmiy tashrif bilan Ukrainaga o‘zining shaxsiy avtomobilida borgan.