2024-yil 1-yanvardan tan olinmagan Tog‘li Qorabog‘ o‘z faoliyatini to‘xtatadi
Bunga nima sabab bo‘lgan?
Tan olinmagan Tog‘li Qorabog‘ respublikasi (TQR) tugatish haqida qaror qabul qilindi.
Qarorni tan olinmagan respublika rahbari Samvel Shaxramanyan imzoladi. Unga ko‘ra, TQR 2024 yil 1 yanvardan tugatiladi.
Barcha davlat idoralari tarqatib yuboriladi, Qorabog‘ hududi to‘liq Ozarbayjon nazoratiga qaytdi.
Maʼlumot o‘rnida, 19-sentyabr kuni Ozarbayjon Qorabog‘da «konstitutsion rejimni tiklash» maqsadida «mahalliy xarakterdagi aksilterror tadbirlar» boshlanganini eʼlon qilgandi. 2020 yildagi urushdan keyin hududga joylashtirilgan rossiyalik tinchlikparvar kuchlar bunga to‘sqinlik qila olmadi.
Ikki kunlik harbiy harakatlardan keyin Tog‘li Qorabog‘ hukumati armiyasini to‘liq qurolsizlantirish va arman harbiy texnikalari hududdan olib ketilishiga rozi bo‘lib, o‘t ochishni to‘xtatish bo‘yicha kelishuvga erishdi. Harbiy harakatlar oqibatida Tog‘li Qorabog‘dagi arman harbiylarining mingdan ortig‘i, Ozarbayjon qurolli kuchlaridan esa 200 ga yaqin kishi halok bo‘lgan. Ozarbayjon hukumati Qorabog‘da qoladigan armanlarga hech qanday tahdid yo‘qligini kafolatlamoqda. Lekin Qorabog‘dagi va Armanistondagi armanlar bunga ishonishmayapti.
Yerevandagilarning maʼlum qilishicha, o‘tgan vaqt ichida Tog‘li Qorabog‘da yashab kelgan 120 mingga yaqin etnik armanlardan kamida 47,1 ming kishi allaqachon Armaniston hududiga o‘tgani haqida maʼlum qilgan.
Odamlar va ularning uy-ro‘zg‘or buyumlari bilan to‘lib-toshgan yuzlab avtomobillar, yuk mashinalari hamda avtobuslar Ozarbayjondan olib keluvchi tog‘li yo‘llar orqali Armaniston tomon harakatlanishda davom etmoqda.
24-sentabrdan boshlab Tog‘li Qorabog‘ aholisi hududni tark eta boshladi. Armaniston hukumati payshanba kuni “65 ming 36 nafar majburan ko‘chirilganlar Armaniston hududiga kirganini” ma’lum qildi. Rasmiy maʼlumotlarga koʻra, Togʻli Qorabogʻda 120 mingga yaqin arman istiqomat qilgan.
