Ramzan Qodirovning qizi bosh vazir o‘rinbosari bo‘ldi
24 yoshli Ayshat Qodirova bungacha respublika madaniyat vaziri lavozimida ishlab kelgan.
Checheniston rahbari Ramzan Qodirovning qizi Ayshat Qodirova bosh vazirning ijtimoiy blok bo‘yicha o‘rinbosari etib tayinlandi. Bu haqda Qodirov o‘zining Telegram kanalida maʼlum qildi.
24 yoshli Ayshat Qodirova bungacha respublika madaniyat vaziri lavozimida ishlab kelgan. Uning o‘rnini Checheniston bosh vazirining sobiq o‘rinbosari Musa Dadayev egallaydi. Checheniston rahbarining aytishicha, qizini bu lavozimga tayinlash taklifi respublika hukumati raisi Muslim Xuchiyev tomonidan ilgari surilgan.
“Albatta, Ayshat Qodirova viloyat Madaniyat vazirligi faoliyatini takomillashtirishga katta hissa qo‘shgan va katta ish tajribasini to‘plagan”, — deydi Ramzan Qodirov.
Eslatib o‘tamiz, 4-sentabr kuni Putin Ayshat Qodirovani II darajali “Vatan oldidagi xizmatlari uchun” ordeni bilan taqdirlagandi. Hujjatga ko‘ra, 24 yoshli Qodirova bir qancha odamlar qatori “milliy madaniyat va sanʼatni rivojlantirishdagi xizmatlari, ko‘p yillik samarali ijodiy faoliyati uchun” taqdirlangan.
