Venetsiyada sayyohlarni olib ketayotgan avtobus yonib ketdi
Avtobus temiryo‘l relslari yonidagi yo‘l o‘tkazgichdan qulab tushgan. YTHda 20 dan ortiq odam halok bo‘lgan, ular orasida bolalar ham bor.
Venetsiyada, Mestre va Marger tumanlarini bog‘lovchi temiryo‘l relslari yaqinida sayyohlarni olib ketayotgan avtobus yo‘l o‘tkazgichdan qulab tushdi va yonib ketdi. Italiyaning Corriere della Sera gazetasining xabar berishicha, ushbu yo‘l-transport hodisasida kamida 21 kishi, jumladan, uch nafar bola halok bo‘lgan. 15 kishi jabrlangan, ulardan to‘rt nafari bolalar, besh nafar yaradorning ahvoli juda og‘ir.
Nashrning yozishicha, avtobusda boshqa yo‘lovchilardan tashqari bir guruh ukrainaliklar va bir necha Germaniya fuqarolari ketayotgan bo‘lgan. Qurbonlar orasida besh nafar Ukraina fuqarosi, bir nemis, bir xorvat, bir fransuz va italiyalik haydovchi bor.
Fojia sodir bo‘lgan joyga shaxsan tashrif buyurgan Venetsiya meri Luiji Brunyaro voqea sodir bo‘lgan joydan, yon tomonida yotgan avtobusdan qora tutun bulutlari ko‘tarilayotgani aks etgan kadrlarni «qiyomat manzarasi» deb atadi. YTH qurbonlari xotirasiga Venetsiyada motam eʼlon qilindi.
Italiya hukumati qurbonlarning oilalariga hamdardlik bildirdi . Xususan, Venetsiya meri Luiji Brunyaroga Italiya prezidenti Serjio Mattarella va mamlakat bosh vaziri Jorja Meloni qo‘ng‘iroq qilgan.
"Men va butun hukumat Mestredagi jiddiy yo‘l-transport hodisasi uchun chuqur hamdardlik bildiramiz. Bizning fikrimiz qurbonlar, ularning oila aʼzolari va yaqinlari bilan", — degan Meloni.
