Suriyada harbiy maktab o‘qqa tutildi: 100 dan ortiq qurbon bor
Dronlar hujumi harbiy xizmatchilar va ularning yaqinlari ishtirok etgan bitiruv marosimida sodir bo‘lgan.
5 oktabr kuni Suriya g‘arbidagi Homs shahrida harbiy kollejga uchuvchisiz o‘choqlar hujumi oqibatida 112 kishi halok bo‘ldi, deya xabar bermoqda Suriya inson huquqlari bo‘yicha monitoring markazi (SOHR). Tashkilot maʼlumotlariga ko‘ra, ular orasida 21 nafar tinch aholi vakillari ham bor. Yana kamida 120 kishi jarohat olgan.
Suriya Sog‘liqni saqlash vazirligining dastlabki maʼlumotlariga ko‘ra, kamida 80 kishi, jumladan, olti ayol va olti bola halok bo‘lgan, 240 ga yaqin kishi jarohatlangan. Dronlar hujumi harbiy xizmatchilar va ularning yaqinlari ishtirok etgan bitiruv marosimida sodir bo‘lgan. Reuters xabariga ko‘ra, Suriya mudofaa vaziri Ali Mahmud Abbos marosimda ishtirok etgan, biroq u hujumdan biroz oldin tadbirni tark etgan.
Suriya hukumati mamlakatda uch kunlik motam eʼlon qildi. Ular hujum uchun javobgarlikni «qurollangan terrorchi guruhlar» zimmasiga yuklagan va «barcha kuch bilan javob qaytarishga» vaʼda bergan. Hozircha hech bir guruh hujum uchun masʼuliyatni o‘z zimmasiga olmadi. Shu bilan birga, Idlib viloyati aholisi Suriya armiyasi, ehtimol, uchuvchisiz o‘choqlar zarbasiga javoban, ommaviy bombardimon qilgani haqida xabar bermoqda. SOHR maʼlumotlariga ko‘ra, sakkiz kishi halok bo‘lgan, yana 30 ga yaqin fuqaro jarohatlangan.
Bu viloyatning bir qismi “Al-Qoida” bilan aloqador guruh tomonidan nazorat qilinadi. AFP eslatishicha, ushbu guruh o‘tmishda Suriya hukumati nazorati ostidagi hududlarga hujum qilish uchun dronlardan foydalangan.
