Tel-Avivda havo qatnovi to‘xtatildi
Ko‘plab aviakompaniyalar Isroilga parvozlarni bekor qilmoqda.
Hamas va Isroil o‘rtasidagi vaziyat tufayli Tel-Avivda havo qatnovi to‘xtatildi. Deyarli barcha xorijiy aviakompaniyalar ushbu yo‘nalishdagi reyslarni bekor qilmoqda, yuzlab isroilliklar o‘z vatanlariga qaytib kela olmay, boshqa mamlakatlar aeroportlarida qolib ketishgan.
Shu bilan birga, Tel-Aviv xalqaro aeroportida favqulodda boshpana joylarini ko‘rsatadigan belgilarni ko‘rish mumkin.
Mahalliy axborot agentliklariga ko‘ra, Falastin va Isroil o‘rtasidagi to‘qnashuvlar oqibatida 700 dan ortiq kishi halok bo‘lgan, 2 mingga yaqin kishi jarohatlangan. Bu oxirgi yillardagi Isroil-Falastin mojarosining eng katta avj olishidir.
Eslatib o‘tamiz, O‘zbekistonning Tel-Avivdagi elchixonasi xabar berishicha, O‘zbekiston Isroil bilan aviaqatnovlarni to‘xtatgani yo‘q.
"Chetga ketishni xohlovchilar samolyot chiptasini sotib olishi mumkin", — deyiladi elchixona xabarida.
Diplomatik missiya Isroilda bo‘lgan vatandoshlardan bedarak yo‘qolgan, jarohatlangan O‘zbekiston fuqarolari haqida yoki boshqa maʼlumotlar to‘g‘risida konsullik bo‘limiga +972 54 485 1397 telefon raqami orqali xabar berishni so‘ragan.
Uzbekistan Airways saytidagi maʼlumotlarga ko‘ra, Tel-Avivdan Toshkentga navbatdagi reyslar 10, 12 va 15 oktyabr kunlariga belgilangan.
