Titan suvosti kemasi haqida yangi tafsilotlar eʼlon qilindi

 

Muhandislar Titanik kemasini ko‘rish uchun yo‘l olgan va baxtsiz sayohat chog‘ida portlab ketgan Titan suvosti kemasi qoldiqlarini topishdi. Bu haqda AQSH Sohil xavfsizlik xizmati xabar berdi.

 

Kema iyun oyida sho‘ng‘ish paytida halokatga uchragan. Uning bortidagi barcha besh yo‘lovchi qurbon bo‘lgan.

 

Suvosti kemasini qidirish xalqaro miqyosda olib borilgan. Jarayon bir necha kun davom etgan va jamoatchilik eʼtiborini tortgandi.

 

Sohil xavfsizlik xizmati xodimlari kemaning qo‘shimcha qismlari o‘tgan hafta okean tubidan topilib, AQSH portiga olib ketilganini aytdi. Tibbiyot xodimlari inson qoldiqlarini tahlil qilmoqda.

 

Titan suvosti kemasi uni qurgan OceanGate kompaniyasi tomonidan eksperimental deb taʼriflangan bo‘lsada, qurilma Shimoliy Atlantika okeanida dengiz sathidan 3800 metr pastda joylashgan Titanik halokatiga bir necha bor sho‘ng‘ishni amalga oshirgan.

 

Suvning kuchli bosimi ostida portlab ketgan kema bortida kompaniya bosh direktori Stokton Rash ham bor edi.

 

Halok bo‘lgan qolgan to‘rt yo‘lovchi: 48 yoshli pokistonlik tadbirkor Shahzoda Dovud, uning 19 yoshli o‘g‘li Sulaymon, 58 yoshli britaniyalik tadbirkor Hamish Xarding va 77 yoshli sobiq fransuz dengiz floti g‘avvosi Pol-Genri Nargeolet.

 

Titan kemasining korpusi uglerod tolasidan yasalgan bo‘lib, uning uchida titanium plitalari va bir uchida kichik oyna mavjud. Uglerod tolasi titan yoki po‘latdan arzonroq va o‘ta mustahkam, ammo u insonlar bilan chuqur dengizga sho‘ng‘ish uchun asosiy sinovdan o‘tmagan edi.

 

Tabiiy ofat bo‘yicha xalqaro tergov davom etmoqda va Sohil Xavfsizlik xizmati kelgusida jamoatchilik muhokamasi o‘tkazilishini aytdi.