HAMAS Putinning pozitsiyasini qadrlashini maʼlum qildi
Avvalroq Putin Isroildagi urushning sabablarini topgani xabar qilingandi.
G‘azoni boshqarayotgan HAMAS guruhi Rossiyaning Isroil agressiyasini to‘xtatish bo‘yicha saʼy-harakatlarini olqishlashini bildirdi. Bu haqda CNN xabar bermoqda.
“Rossiya prezidenti Vladimir Putinning xalqimizga qarshi sionistik tajovuzga, gumanitar yordam yetkazib berishni to‘xtatish va xavfsiz tinch aholiga hujum qilishga qarshi turishi haqidagi pozitsiyasini yuqori baholaymiz”, — deyiladi HAMAS bayonotida.
Avvalroq Rossiya prezidenti Putin Isroil va HAMAS o‘rtasidagi janglarda har ikki tomonni tinch aholi qurbonlarini “minimallashtirish yoki nolga tushirish”ga chaqirgandi.
Shuningdek, Putin Isroildagi urushning “sabablarini” topgani xabar qilingandi. Kreml rahbarining so‘zlariga ko‘ra, Isroil Falastin yerlarining bir qismini bosib olgan, Qo‘shma Shtatlar esa Yaqin Sharqdagi aholi punktlarini joylashtirish mexanizmlarini eʼtiborsiz qoldirgan.
